500 пазбаўленых працы беларусаў перавучваюцца на IT. Як звольненым праз пратэсты памяняць прафесію бясплатна

Асвоіць новую прафесію ў IT змогуць усе беларусы, якія страцілі працу праз удзел у пратэстах або абвяшчэнне сваёй пазіцыі. Бясплатныя курсы для іх запусцілі айцішнікі з Гродна. Праз тры дні яны далучыліся да агульнай ініцыятывы па Беларусі. Высветлілася, што навучаць новых супрацоўнікаў гатовыя праграмісты і распрацоўшчыкі па ўсёй краіне.

З сілавікоў у інтэрнэт-маркетынг

У Гродне ідэю падтрымалі 17 чалавек. Досвед працы ў сферы інфармацыйных тэхналогій сярод іх — ад аднаго да сямі гадоў.

Перавучыцца прапануюць і сілавікам. «Героям, якія адмовіліся парушаць закон і прысягу, у якой яны кляліся абараняць свой Народ, а ўжо пасля гэтага суверэнітэт дзяржавы», — удакладніў аўтар ідэі курсаў, распрацоўшчык з Гродна Сяргей Дзятлаў, у сваёй заяве для беларускіх СМІ. Кампанію, у якой працуе ён і большасць гарадзенскіх валанцёраў, Сяргей папрасіў Hrodna.life не называць. Паводле яго слоў, ідэя курсаў не мае да яе дачынення, гэта іх асабістая пазіцыя.

Ідэя дапамагчы людзям такім чынам прыйшла яму ў галаву адразу пасля выбараў. Дзятлаў наткнуўся на аб’яву калегі Віталя Румянцава ў сацыяльнай сетцы LinkedIn. Той шукаў «дыджэяў Пераменаў», якія ўключылі Цоя на мерапрыемстве ў Мінску перад выбарамі і звольненых з заводаў ці з МУС за непадпарадкаванне злачынным загадам, каб навучыць іх iOS-распрацоўцы бясплатна.

Чытайце таксама: Дзе і як пацярпелыя пасля акцый гарадзенцы могуць атрымаць дапамогу

Першапачаткова гродзенцы планавалі арганізаваць афлайн лекцыі для жыхароў горада і анлайн-семінары для іншагародніх. Праз пару дзён выявілася, што айцішнікі з іншых гарадоў таксама вырашылі дапамагаць пазбаўленым працы беларусам новымі ведамі. Гродзенскія валанцёры далучыліся да агульнага праекту.

Зараз ініцыятыва набірае групы па кірунках:

• інтэрнэт-маркетынг;
• тэставанне;
• базы дадзеных Oracle;
• Javascript;
• HTML, CSS, JavaScript, Vue.js (у фармаце ментарынгу: выкладчык не будзе чытаць лекцыі сам, а будзе даваць спасылкі на рэсурсы/відэа/кнігі для саманавучання, а на занятках абмяркоўваць вывучанае, адказваць на пытанні, дапамагаць і накіроўваць);
• HTML, CSS, JavaScript (стандартны фармат з лекцыямі ад выкладчыка).

Каб пераканацца, ці сапраўды чалавек пацярпеў за сваю пазіцыю, ці проста хоча зэканоміць на вучобе па прэстыжным профілі, аўтары курсаў праводзяць гутаркі з кандыдатамі асабіста. Сяргей за апошнія дні чуў ужо досыць гісторый людзей, якія прайшлі праз рэпрэсіі: ім ёсць, што расказаць. Тым, хто пацярпеў менш і сам сышоў з дзяржслужбы, прапануюць анлайн-ментарства (саманавучанне пад наглядам).

«Проста зрабіць першы крок«

«У IT шмат людзей з абсалютна розных сфер. Сярод нас ёсць зваршчык, настаўнік, юрыст, — распавёў Сяргей Дзятлаў пра гродзенскую каманду. — Таму мы ўпэўненыя, што важна проста зрабіць першы крок. На жаль, не кожны чалавек зможа працаваць у IT, таксама як не кожны зможа стаць міліцыянерам або лекарам. Але мы дакладна ведаем, што перспектывы будуць адкрыты: далейшае навучанне, магчымасць стажыроўкі ў IT-кампаніях, канкурэнтаздольнасць». Сам Сяргей працуе front-end распрацоўшчыкам паўтара года. Ён самавучка, раней быў ізаліроўшчыкам на ЦЭЦ-2.

Да валантораў у Гродне па дапамогу звярнуліся ўжо больш за 10 чалавек. Цяпер над агульным праектам па перанавучанні працуюць 70 айцішнікаў розных спецыяльнасцяў - выкладчыкаў і асістэнтаў. Частка валантораў з праекта шукаюць і запісваюць тых, хто мае патрэбу ў дапамозе, частка навучаюць.

У Telegram працуе канал FreeIT з інфармацыяй па курсах і чат, дзе фармуюць групы. Зараз у агульным канале FreeIT больш за 1000 чалавек, навучанне праходзяць каля 500. За апошні тыдзень значна павялічылася колькасць як студэнтаў, так і выкладчыкаў, ствараюцца новыя групы.

Для запісу на курсы можна напісаць наўпрост у Telegram менеджарцы па зборы групаў Яўгеніі @Eugenia_Ka. У паведамленні трэба пазначыць прычыну звароту. Зараз яна запісвае тых, хто жыве ў Беларусі і быў звольнены або звольніўся сам у сувязі з апошнімі падзеямі. Таксама можна пісаць Сяргею Дзятлаву @sergey_dyatlov.

Беларускія айцішнікі запусцілі курсы яшчэ да выбараў

Агульны праект дапамагае не толькі тым, хто страціў працу ў сувязі з падзеямі ў Беларусі пасля выбараў. Там навучаюцца і тыя, каго скарацілі праз «каронакрызіс», ёсць і людзі з абмежаванымі магчымасцямі.

Праект прыдумалі ў канцы чэрвеня 2020 года, калі стала з’яўляцца шмат інфармацыі аб звальненнях, звязаных з пандэміяй. Толькі за першыя суткі пасля запуску звярнулася каля 300 чалавек, далучылася шмат валанцёраў-настаўнікаў. У асноўным у адміністрацыйнай групе ўсе з Беларусі, але ёсць і тыя, хто цяпер жыве ў Расіі, Еўропе, Канадзе, ЗША.

Першыя групы запусцілі ў пачатку ліпеня. Інфармацыя пра тое, на якія курсы вядуць запіс, пастаянна абнаўляецца. Калі чалавек не ўяўляе, у які кірунак яму ісці, яму дапамагаюць вызначыцца: пазнаюць ўзровень англійскай мовы, высвятляюць, ці ёсць хоць нейкі вопыт у IT-сферы, якія ёсць веды і навыкі.

Не ўсе, хто звярнуўся, застаецца на курсах: камусьці робіцца нецікава, хтосьці не спраўляецца з нагрузкай. «Зыходзячы з таго, што мы бачым цяпер па актыўнасці ў групах, можна зрабіць выснову, што канверсія [тых, хто звярнуўся і навучэнцаў - заўв. Hrodna.life] не вышэй за 20%», — кажа Яўгенія.

Чытайце таксама:

• В Гродно 700 человек осудили за мирные акции, 175 — арестовали. Как вернуть оплаченный штраф?
• В Гродно создали стачком: в него вошли представители 22 предприятий