Паўтара года абмежавання волі атрымала Анастасія Каламейчанка за сторыс у Instagram. На партрэце прапаршчыцы АМАП Дар'і Бандарчук было напісана чатыры словы. Два з іх — «пошук» і «рэпост». Суд Кастрычніцкага раёна прызнаў публікацыю публічнай абразай супрацоўніцы міліцыі і прычыненнем шкоды дзяржаўнай улады.

Абвінаваўцам на працэсе выступала пракурор Алена Пранько. Прысуд вынесла суддзя Маргарыта Ланцэвіч.

Падтрымаць Анастасію ў судзе прыйшлі больш за 10 гродзенак і блогер Вадзімаці. Калі не браць яго ў разлік, можна сказаць, што ў зале суда былі толькі дзяўчыны.

«Мы па Анастасію, трэба праехаць»

Для Анастасіі «справа аб сторыс» пачалася раніцай 8 снежня. Напярэдадні яна разам з двума дзецьмі 5 і 7 гадоў прыехала ў госці да свякрові і засталася там начаваць. Разбудзіў сям’ю візіт міліцыі. Спачатку праваахоўнікі правялі ператрус па месцы прапіскі Анастасіі, дзе жывуць яе маці і сястра. Потым прыехалі да свякрові.

У справе толькі дзяўчаты. Гродзенцы далі 1,5 гады хатняй хіміі за абразу супрацоўніцы АМАП
Марыя Каламейчанка, свякроў Анастасіі

«Ордэра на ператрус у маёй кватэры ў іх не было, — распавядае Марыя Каламейчанка, свякроў Анастасіі. — Толькі дакумент, што супраць Насты ўзбуджаная крымінальная справа і ордэр на ператрус кватэры, дзе яна прапісаная. Але тэлефон забралі з майго дома. І Насцю таксама».

«Я нават не ведала, за што мяне затрымалі, — кажа Анастасія. — Пасадзілі ў мікрааўтобус з танаваным шклом і паехалі „катаць“. Што адбываецца? Куды вязуць? Нічога не было зразумела. Атрымліваецца, што мяне проста выкралі».

У гэты дзень Насту адвезлі ва Упраўленне ўнутраных спраў, а потым у Следчы камітэт. Скончыўся маршрут у ізалятары часовага ўтрымання. Там Каламейчанку пакінулі на трое сутак.

суд за сторис, домашняя химия
Гродзенка Анастасія Каламейчанка. Супраць яе распачалі крымінальную справу паводле артыкула 369 Крымінальнага кодэксу «Публічная абраза прадстаўніка ўлады ў сувязі з выкананнем ім службовых абавязкаў»

Анастасіі паказалі раздрукоўку яе сторыс, скрын якой разышоўся па многіх гарадскіх Telegram-каналах. Пост аднаго з іх ўбачыла Бандарчук.

Пасты, у якіх згадвалася Дар’я Бандарчук, з’явіліся ў Telegram-каналах Гродна ў час суда над 55-гадовай фармацэўткай Марынай Палікарпавай. Бандарчук праходзіла па справе адной з пацярпелых.

У справе толькі дзяўчаты. Гродзенцы далі 1,5 гады хатняй хіміі за абразу супрацоўніцы АМАП
Скрын з відэарэпартажу УУС Гродна «Моцная прыгажосць»

Па версіі абвінавачвання Палікарпава наўмысна ўжыла ў дачыненні да супрацоўніц АМАП гвалт — адну з іх ўкусіла, іншую ўдарыла. Суд прыгаварыў яе да двух гадоў хатняй хіміі, абавязаў выплаціць па 1 500 рублёў кожнай з пацярпелых супрацоўніц АМАП, а таксама кампенсаваць выдаткі на дзяржпошліны і судовыя выдаткі.

Чытайце таксама: «Я — Маша Лукашэнка, а я — Наста Лукашэнка». Што вядома пра дзяўчат з АМАПа, якія збілі 55-гадовую жанчыну ў Гродне

«Мая нявестка — не злачынца»

«Гэтай сторыс не было сярод захаваных на маім тэлефоне. Я казала на следстве і на судзе, што акаўнт маглі ўзламаць. Што хтосьці мог стварыць падробленую старонку і заскрыніць мільярд падобных гісторый. Што доступ да акаўнта ёсць ў многіх маіх сяброў - я не забараняю ім заходзіць, там няма ніякіх сакрэтаў. Калі я была ў ІЧУ, а тэлефон захоўваўся ў міліцыі, уваходы ў Instagram таксама былі», — распавяла Анастасія Каламейчанка.

Пацярпелая прапаршчыца АМАП на абвяшчэнне прысуду не прыйшла. Падчас папярэдніх пасяджэнняў суда яна выказвала меркаванне, што абразлівыя паведамленні ў яе адрас звязаныя з палітычнай становішчам у краіне пасля выбараў. «Я як супрацоўніца міліцыі абараняла канстытуцыйны лад. Камусьці гэта не спадабалася».

Фінансавых прэтэнзій у дачыненні да абвінавачанай Бандарчук не вылучала.

У ходзе суда праходзіла і лінгвістычная экспертыза заскрыненага тэксту. Па выніках даследавання выяўлена, што там была абраза Бандарчук як фізічнай асобы. Згадак пра яе службу ў міліцыі і прыналежнасці да дзяржаўнай улады аналізаваны тэкст не утрымліваў.

«Не магу пагадзіцца, што мая нявестка — крымінальшчыца, — кажа Марыя Каламейчанка. — Прысуд вынесены несправядліва. Былі падставы, каб перакваліфікаваць абвінавачванне».

Такога ж меркавання прытрымліваецца адвакат абвінавачанай. Падчас спрэчак яна адзначала розніцу паміж артыкулам 369 КК (Публічная абраза прадстаўніка ўлады) і артыкулам 189 КК (Абраза фізічнага асобы праз непрыхільнае стаўленне). У новай рэдакцыі Крымінальнага кодэкса гэты артыкул дэкрыміналізаваны, і крымінальную справу трэба было закрыць.

суд за сторис, домашняя химия
Пасля суда. Анастасія і Марыя Каламейчанкі абмяркоўваюць з адвакатам абскарджанне прысуду

Хатняя хімія і канфіскацыя iPhone

Паводле рашэння суда Анастасію Каламейчанку асудзілі на 1,5 года абмежавання волі без адбыцця пакарання ва ўстанове адкрытага тыпу. Гэта значыць, што яна зможа заставацца дома. Але ёй забаронена выязджаць з Гродна, ужываць спіртныя напоі і выходзіць з дому пасля 19.00. У любы час да яе можа прыйсці міліцыя.

Айфон Анастасіі прызналі прыладай здзяйснення правапарушэння і канфіскавалі.

У справе толькі дзяўчаты. Гродзенцы далі 1,5 гады хатняй хіміі за абразу супрацоўніцы АМАП
Анастасія знаёміцца з умовамі абмежавання волі і дае падпіску аб нявыездзе

Блогер Вадзім Ермашук, удакладняючы ўмовы хатняй хіміі:

— Значыць, на дыскатэку я Насту ўжо не змагу запрасіць?

— Яшчэ ёсць пара дзён адарвацца [пакуль прысуд не ўступіць у сілу], — удакладніла супрацоўніца суда.

У блогера Вадзімаці (Вадзіма Ермашука) — дыплом ГрДУ аб вышэйшай юрыдычнай адукацыі і маці - у мінулым адвакатка. У судзе Кастрычніцкага раёну, дзе ішоў працэс над Анастасіяй Каламейчанкай, Ермашук праходзіў вучэбную практыку. «На суды хаджу па два — чатыры разы кожны тыдзень. Цікава назіраць правапрымяняльную практыку. Я ў жаху ад таго, што адбываецца. Мне сорамна. Закон не працуе».

суд за сторис, домашняя химия
Злева направа: Анастасія Каламейчанка, Вадзім Ермашук, Наталля Пужэль і Алена Белятка

Жаночае кола падтрымкі

«Як у любога чалавека, у Насты ёсць свае вартасці і недахопы. Я прымаю яе такой, як ёсць. Вартасці падкрэсліваю, за недахопы крытыкую, а ў цяжкую хвіліну прыйшла падтрымаць», — кажа свякроў Анастасіі.

Разам з блізкімі дзяўчыны на суд прыйшлі яшчэ больш за 10 гродзенак. Сярод іх — Ліза Белятка і Наталля Пужэль. Абедзве распавялі, што з Настай сёння сустрэліся ў першы раз. «Мы ўсе пазнаёміліся на судах. Калі можам, ходзім падтрымаць людзей». Ліза працуе ў рэжыме «два праз два», і выхадныя часта праводзіць у судах. «Маю сям’ю таксама закранулі жнівеньскія падзеі. Я ўсё бачыла на свае вочы. Не магу цяпер сядзець склаўшы рукі і нічога не рабіць».

«Даведалася пра суд над Настай з сторыс Вадзіма, прыйшла падтрымаць», — кажа Наталля Пужэль. «Закранулі падзеі і мяне. І сінякі ад АМАП былі, і звальненне з працы. Я не хавала сваю грамадзянскую пазіцыю — на працу хадзіла з бел-чырвона-белым парасонам, не падпісвала праўладных лістоў. Знайшлі нагоду, каб прапанаваць мне звольніцца». Цяпер, як на працу, Наталля ходзіць на суды.

Анастасія Каламейчанка віну не прызнала. Прысуд суда яна будзе абскарджваць.

Чытайце таксама:

Рэдактарка спецпраектаў, рэпарцёрка, фатографка і відэографка. У журналістыцы з 2015 года. Удзельнічала ў распрацоўцы канцэпцыі рэбрэндынгу выдання «Твой стыль» і стварэнні «Hrodna.life». Паводле адукацыі Ірына інжынер-механік, таму не цураецца тэхнічна-складаных фарматаў.

Найчасцей піша сацыяльныя рэпартажы. Любімая справа — вынаходзіць ровар і ставіць амбітныя мэты для ўсіх, хто не паспеў схавацца.

Матэрыялы Ірыны Новік былі адзначаны дыпломамі многіх конкурсаў.