Каву ад інклюзіўных барыста можна пакаштаваць у Гродне

Праект «Інклюзіўны барыста» з 27 чэрвеня пачаў навучальны курс у Гродне. Чацвёра маладых людзей з інваліднасцю атрымаюць прафесійны досвед і магчымасць знайсці працу. Навучанне праходзіць у кавярні «Наша кава».

Бліжэйшымі днямі наведвальнікі могуць назіраць за навучаннем барыста, а ў пятніцу 29 чэрвеня, на выпускным курса, пакаштаваць прыгатаваныя інклюзіўнымі барыста напоі.

Навучанне ў рэальных умовах

Навучанне адразу на працоўным месцы, у рэальных умовах, нават падзадорвае да асваення прафесіі, мяркуе барыста Мікіта Месяц:

«Людзі адразу патрапілі ў працоўную атмасферу, адчулі і ўбачылі, як жыве кавярня. Так вучыцца лепш, чым у закрытым класе ў адрыве ад жыцця. Мяркуючы па водгуках нашых наведвальнікаў, праект будзе паспяховым. Усе распытваюць, цікавяцца і вельмі пазітыўна рэагуюць на інклюзіўных барыста».

Супрацоўнікі кавярні на гэты час стануць інструктарамі і памочнікамі пачаткоўцаў. «У кожнага з працуючых у нас барыста ёсць уласны досвед навучання. Тым, хто прыходзіў сюды працаваць, мы таксама дапамагалі асвоіць прафесійнае майстэрства на працоўным месцы», — расказвае Мікіта.

«Для мяне асабіста праект даў вельмі цікавы досвед. Лекцыя Максіма Яшына — гэта магчымасць асвяжыць і абнавіць свае веды. Думаю, што ўсё атрымаецца добра. Мы дапамаглі прыстасаваць працоўныя месцы пад патрэбы інклюзіўных барыста і падтрымаем іх. Такія людзі таксама маюць права на цікавую працу. Прафесія барыста можа ім падыйсці».

Не для таго, каб з’явілася новае хобі

Кіраўнік і аўтар праекта Саша Аўдзевіч, вазочнік з Ліды, распавёў, што гродзенская школа інклюзіўных барыста ўжо чацвёртая. Праект стартаваў у Лідзе на пачатку красавіка. Пазней школы прайшлі ў Шчучыне і Смаргоні. Наперадзе — яшчэ 6 гарадоў Гродзеншчыны. За гэты час каманда праекта таксама добра «пракачала» свае магчымасці.

«Мы навучыліся адаптоўваць прастору кавярняў для інклюзіўных барыста і эфектыўна камунікаваць з людзьмі. Мы сталі больш патрабавальна падыходзіць да адбору прэтэндэнтаў, каб даць магчымасць прайсці навучанне самым матываваным, хто насамрэч хоча паспрабаваць сябе ў працы. Гэта не для таго, каб у чалавека з’явілася новае хобі. Хочам, каб школа паспрыяла не толькі павышэнню культуры спажывання кавы, але і далейшаму працаўладкаванню навучэнцаў. Каб інклюзіўныя барыста маглі самастойна зарабляць грошы і радавацца жыццю».

Па словах Аўдзевіча, адна з навучэнак першай школы, Наташа Астаніна, ужо знайшла працу ў новай кавярні ў Лідзе.

[irp posts="56 750″ name="Барыста на інвалідным вазку? Лёгка! У Лідзе адбыўся першы выпуск школы інклюзіўнага барыста"]

Адчуць смак кавы і асалоду жыцця

Гродзенскія інклюзіўныя барыста актыўна ўключыліся ў навучанне. Максім Аўрамчыкаў зараз студэнт і жыве ў інтэрнаце. «Можна нават арганізаваць тут бізнес. Чаму б не прапанаваць суседзям добрую каву? Трэба падумаць пра сваю нішу на рынку. Гэта можа быць магчымасцю заробку».

Лекцыя пра гатаванне кавы таксама зрабіла на Максіма ўражанне. «Нам расказалі, што каву можна запарваць не толькі вадой, а напрыклад, морсам. Прыду дадому — адразу паспрабую так зрабіць. Цікава, які атрымаецца смак».

Аксана Якуцэвіч расказала, што ад самага пачатку праекта сачыла за ім ў інтэрнэце і чакала прыезда школы ў Гродна. «Мне падабаецца водар кавы, працэдура яе прыгатавання і антураж кавярні. Я рэдка п’ю каву, але мне падабаецца яе гатаваць. Прафесія барыста якраз дае такую магчымасць».

Што да перашкодаў, то іх Аксана проста не бачыць. «Ніякай няёмкасці ад таго, што я у кавярні на вазку няма. І людзі навокал таксама нармальна нас тут ўспрымаюць. А да ўвагі ў наш бок мы прызвычаіліся пасля ўдзелу ў модным шоў. Зараз гэта не бянтэжыць, унутраны бар’ер пераадолены.

[irp posts="52 609″ name=""Яны сапсуюць свята" ці «У гэтым адзенні людзі»? Мадэлі з інваліднасцю ўпершыню ў Беларусі паўдзельнічалі ў модным шоў"]

Правільны бізнес натхняе

Для кіраўніка кампаніі 9bar Максіма Яшына, каторы вядзе навучанне барыста, школа стала яшчэ і магчымасцю спаўнення ўласнай мары. «У мяне заўжды было адчуванне, што быць настаўнікам — гэта мае прызванне. Але жыццё такое, што трэба зарабляць грошы і я дастаткова рана сышоў у бізнес. А жаданне быць выкладчыкам засталося. Таму для мяне праект гэта яшчэ і магчымасць здзейсніць сваю даўнюю мару і пачаць выкладаць, пры гэтым выконваючы важную для грамадства справу.»

Чыннік карыснасці для ўсіх, меркаваннем Яшына, вельмі важны ў бізнес-праекце. «Бізнес — гэта не толькі пра тое, як зарабіць грошы. Гэта пра тое, як вырасціць будучыню, як у яе інвеставаць. Правільны бізнес натхняе людзей рабіць тое, што яны робяць. Бо калі няма натхнення, то справа вельмі хутка скончыцца».

---

Школа «Інклюзіўны барыста» праводзіцца ў рамках праекта «Вучыцца, каб дзейнічаць «, які фінансуецца Еўразвязам і сафінансуецца DVV International.