Дадаць навіну
Субота, 17 лістапада 2018, 04:37

Бар “Бочка” на Урыцкага ўжо не адкрыецца. Але ёсць праект новага паба

Знакаміты ў мінулым бар «Бочка», што працаваў у савецкім бомбасховішчы па вуліцы Урыцкага, зачынены ўжо больш за пяць гадоў. Ён быў папулярны ў гродзенцаў з канца 1990-х гадоў, а ў 2012 годзе, напярэдадні Фестывалю нацыянальных культур, быў зачынены згодна з санітарнымі нормамі. Што стала з памяшканнем за гады прастою, даведваўся Hrodna.life.

У канцы 1990-х бар набыла кампанія «Фобус», офіс якой знаходзіўся побач, на Урыцкага, 12. Кампанія дагэтуль там знаходзіцца, а вось бар так і не адкрыўся.

«Памяшканне «Бочкі» раней належала іншым уладальнікам, а пасля мы яго купілі, – распавядае намеснік дырэктара кампаніі «Фобус» Андрэй Буяк. – Бар зачынілі ў маі 2012 года перад самым Фестывалем нацыянальных культур. Па розных прычынах: як паводле санітарных нормаў, так і з-за рэканструкцыі будынка, дзе знаходзіцца наш офіс. У 2014 годзе мы нават распрацавалі праект пад адкрыццё новай установы на цокальным паверсе нашага будынка, куды ўваходзіла і пустуючае памяшканні “Бочкі”.

Бар "Бочка" на Урыцкага ўжо не адкрыецца. Але ёсць праект новага паба
Так выглядаў уваход у зачынены бар “Бочка” ў 2014 годзе

Згодна з праектам «Фобуса» на цокальным паверсе будынка меўся адкрыцца сучасны вялікі паб для моладзі, але з-за крызісу ідэя засталася толькі на паперы. Уваход у “Бочку” павінен быў стаць адным з уваходаў у новую ўстанову.

«Былі цяжкія часы і распрацаваны праект быў адкладзены. Але ўжо тады мы ведалі, што «Бочкі» на Урыцкага больш не будзе. Мы хацелі зрабіць нешта больш цікавае і маштабнае для моладзi.

Сёння вуліца Урыцкага не такая шматлюдная, як Савецкая або тая ж Калючынская. Апошняя набыла папулярнасць толькі ў апошнія гады, калі там пачалі з’яўляцца бары і розныя ўстановы. Мне здаецца, і з Урыцкага хутка так будзе – жыхары ўжо пачынаюць з’язджаць са старых дамоў і прадаюць іх пад офісы».

Гатовыя паказаць праект паба

Час ад часу пустуючае памяшканне памерам у 400 метраў квадратных прыязджаюць паглядзець патэнцыйныя арандатары, але пакуль ніхто не бярэцца там нешта адкрываць. Дарэчы, старая «Бочка» ў свой час займала ўсяго 40 квадратаў.

Бар "Бочка" на Урыцкага ўжо не адкрыецца. Але ёсць праект новага паба
Праект паба 2014 года, які павінен быў адкрыцца на цокальным паверсе будынка па вуліцы


«Усе хочуць прыехаць на гатовае, але ў нас тут толькi сцены без нейкага рамонту. Калі знойдзецца арандатар, мы нават гатовыя паказаць свой праект паба»
, – адзначыў Андрэй Буяк.

Даведка

Дом № 12 па вуліцы Урыцкага быў пабудаваны ў 1911 годзе. У 2014 годзе завяршылася яго рэканструкцыя. Гэта адзін з самых удалых прыкладаў рэканструкцыі гістарычнай часткі Гродна апошнiх гадоў. Дом быў разабраны па цаглінах і з гэтых жа самых, а не сілікатных блокаў, зноў  быў складзены. Цяпер гэта офісны будынак з вялiкiм памяшканнем на цокальным паверсе.

Бар "Бочка" на Урыцкага ўжо не адкрыецца. Але ёсць праект новага паба

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.

Раім пачытаць

Каментары

comments powered by HyperComments

Spelling error report

The following text will be sent to our editors: