У 2026 годзе ў Фестывалі нацыянальных культур у Гродне будзе на шэсць нацыянальнасцей больш, чым двума гадамі раней. Сярод новых народнасцяў – прадстаўнікі Габоны, Гагаузіі, Удмуртыі, Йемена, Турцыі і Чэхіі. Усяго ў фестывалі паўдзельнічаюць 800 чалавек, паведаміў Гродзенскі гарвыканкам.
Таксама вызначыліся з колькасцю падворкаў – іх сёлета будзе 19. За кожнай пляцоўкай замацуюць прадпрыемства, каб яно дапамагала ў арганізацыі работы падворка.
Адной з канцэпцый гала-канцэрта стане падабенства традыцый розных нацыянальнасцей. «Вырашылі лейтматывам узяць святы народаў і іх неяк аб’яднаць у адну канцэпцыю», — пракаментавала «Гродно Плюс» дырэктар рэспубліканскага цэнтра Нацыянальных культур Вольга Хачкова.
Як арганізуюць лакацыі фестывалю?
У 2026 годзе Фестываль нацыянальных культур правядуць у 15-ы раз. Свята запланавана на 5—6 ліпеня. Галоўную пляцоўку размесцяць на плошчы Леніна, на Савецкай плошчы будзе беларускі падворак.
Мінулы фестываль, які прайшоў у 2024 годзе, наведалі 220 тыс. чалавек. Таму сёлета зону мерапрыемстваў плануюць павялічыць. Напрыклад, гандаль хочуць размясціць на вуліцы Ажэшкі.
У 2026 годзе фестываль будзе юбілейным
Фестываль нацыянальных культур праводзяць у Гродне з 1996 года. На яго прыязджаюць прадстаўнікі розных дыяспар, якія жывуць у Беларусі. На нацыянальных падворках яны знаёмяць гасцей са сваёй культурай, кухняй, музыкай, традыцыямі.
У першым фестывалі ў 1996 годзе ўдзельнічалі прадстаўнікі ўсяго 11 дыяспар. На папярэднім фестывалі ў 2024 годзе паставілі рэкорд – выступалі 35 розных нацыянальнасцяў (36-мі былі беларусы). У 2026 годзе лічбу плануюць павялічыць да 42 прадстаўнікоў.
У гэтым годзе ў фестывалю двайны юбілей: 30 гадоў з заснавання і 15-е па ліку свята.
Чытайце таксама: Фестывалю нацыянальных культур споўнілася 25 гадоў. Як ён змяніўся за гэтыя гады?
