Аглядальную пляцоўку каля Новага замка ў Гродне добраўпарадкоўваюць: на тэрыторыі ўжо ўкладваюць плітку. Рамонтныя работы выклікалі неадназначную рэакцыю — адны гараджане шкадуюць аб страце асаблівай атмасферы, іншыя лічаць аблагароджванне лагічным рашэннем, бо месца карыстаецца папулярнасцю ў турыстаў.
Змены на схіле каля Новага замка анансаваў дэпутат Гродзенскага гарадскога Савета і дырэктар тэлеканала «Гродна Плюс» Сяргей Мазайла.
Ён падымаў тэму аглядальнай пляцоўкі каля Новага замка яшчэ ў 2024 годзе. Пост з фармулёўкай «месца вытаптана, можа пара добраўпарадкаваць» тады ён апублікаваў у сваім Telegram-канале. Там жа ён паведаміў, што пытанне з аблічбоўкай пляцоўкі будзе вырашана. Больш за тое — ужо гатовы праект рэканструкцыі ўсяго дворыка Новага замка.
Праз амаль два гады ён напісаў:
«Зараз на тэрыторыі Новага замка ідуць рамонтныя работы, якія закранулі і гэтае любімае месца ў турыстаў і жыхароў горада. Яно не было абсталявана для наведвання, але стала вельмі папулярным з-за віду. Яго абсталююць і забяспечаць доступ. Як звычайна, нічога лішняга».
У Threads разгарнулася дыскусія пад іншым постам аб пераўтварэнні аглядальнай пляцоўкі каля Новага замка.
Праціўнікі добраўпарадкавання
«Бывайце, утульныя гродзенскія пікнікі з відам на замак», — напісала адна з каментатарак.
«Можна лічыць мяне “стараверам”, але быў там асаблівы кайф — пералазіць праз плот, падаць на газон пад ценем дрэва, слухаць вецер, горад. Было ў гэтым штосьці наша, гродзенскае, асабістае. Асабліва перад натоўпамі турыстаў. Ці быць там з кавай або ліманадам [з відам] на заход сонца. Як варыянт — прыбраць адно звяно плота, што прымыкала да будынка. А цяпер плітка і плітка. Чарговая», — сумуе адна з гродзенак.
Іншы карыстальнік: «Ну гэта проста жах… Навошта? Так вайбова было прысесці каля дрэва і глядзець, што там унізе адбываецца. А цяпер — прыйшоў, пастаяў і сышоў. Мдаа».
Нехта напісаў, што «патрабуе кнігу скаргаў».
Прыхільнікі зменаў
«Нарэшце! Даўно пара было там усё давесці да ладу, усё вытаптана было. Крута, калі паставяць лаўкі і пакінуць месца для пікнікоў», — напісала адна з каментатарак.
Нехта распавёў, што добраўпарадкаванне тэрыторыі на стыхійнай аглядальнай пляцоўцы маглі б зрабіць і раней.
«Гэта б пачалося раней, але доўгі час комплекс будынкаў належыў не толькі музею. Напрыканцы 2025 канчаткова з’ехаў гарадскі архіў і таму музей пачаў рэстаўрацыю. Рэстаўрацыя закранае толькі курданёр (парадны двор перад будынкам палаца — Hrodna.life). Там у Старога замка яшчэ да палацу не перайшлі».
Нехта выказаў здагадку, чаму тэрыторыю добраўпарадкоўваюць:
«Турысты даведаліся пра выдатную аглядальную пляцоўку — спачатку зрэзалі плот, каб не перашагваць, але траўка пад дрэвамі хутка была вытаптана натоўпамі ахвотных. Таму лагічна прыйшлі да такога рашэння».
Ідэю дадаць кавярню прапанаваў яшчэ адзін карыстальнік:
«Яшчэ кавяраньку трэба зрабіць у будынку, што каля гэтай пляцоўкі. [Ад] кліентаў адбою б не было».
Што за пляцоўка?
«Народная» пляцоўка размяшчаецца справа ад уваходнай брамы на тэрыторыю Новага замка. Яна вытаптана, і патрапіць на яе можна, толькі пералазячы праз плот, бо праходу няма. Часцей за ўсё гродзенцы збіраюцца там, каб назіраць за захадам сонца або проста пасядзець пад дрэвамі з кавай і прыгожым відам. Многія фатаграфуюцца ў гэтым месцы на фоне Старога замка.
