Самай папулярнай вуліцай для сутачнай арэнды ў Гродне стала вуліца Курчатава — менавіта тут турысты часцей за ўсё спыняюцца на ноч. Такую выснову зрабілі аналітыкі сэрвісу «Куфар Жылыё», склаўшы рэйтынг самых запатрабаваных вуліц для кароткатэрміновай арэнды жылля ў розных гарадах Беларусі, паведамляе «Вячэрні Гродна».
Рынак сутачнай арэнды працягвае актыўна расці. Паводле даных сэрвісу, за мінулы год у беларускіх кватэрах было заброніравана больш за 400 тысяч начэй.
У Мінску абсалютным лідарам стала вуліца Ігара Лучанка: у 2025 годзе тут спыняліся на ноч каля 13 тысяч разоў. Высокі попыт таксама зафіксаваны на вуліцах Пятра Мсціслаўца, Ніколы Тэслы, на праспекце Свабоды і вуліцы Белградскай.
Усе гэтыя лакацыі размешчаны ў новых кварталах, пераважна ў раёне «Мінск-Свет». Папулярнасць тлумачыцца вялікім выбарам жылля, сучаснымі рамонтамі і параўнальна даступнымі цэнамі. У раёне актыўна куплялі кватэры менавіта пад наступную здачу ў арэнду.
Дзе турысты спыняюцца ў абласных цэнтрах
Кватэры на суткі актыўна здымаюць і ў абласных цэнтрах. У Брэсце часцей за ўсё выбіраюць жыллё на вуліцы Гогаля, у Віцебску — на Маскоўскім праспекце, у Гомелі — на праспекце Перамогі, у Гродне — на вуліцы Курчатава, а ў Магілёве — на праспекце Міру.
Ва ўсіх выпадках гаворка ідзе пра буйныя вуліцы, дзе ёсць зручнае транспартнае спалучэнне і развітая інфраструктура.
«Мы бачым, што ў сутачнай арэндзе людзі ўсё часцей выбіраюць новыя дамы і раёны як альтэрнатыву класічным турыстычным лакацыям. Ключавымі фактарамі становяцца камфорт, свежы сучасны рамонт, новая тэхніка і зручнае транспартнае спалучэнне», — адзначаюць у «Куфар Жылыё».
Месцаў для жылля не хапае
Турыстычны паток у горад з 2021 па 2025 год перавысіў 130 тысяч замежных гасцей, і больш за 80% з іх прыязджаюць з Расіі, паведамляла тэлерадыёкампанія «Гродна». Акрамя расіян, прыязджаюць турысты з іншых краін СНД, а таксама Польшчы і Літвы.
Кошт пражывання ў горадзе розны: у хостэлах можна зняць месца ад 40–45 рублёў. Хоць у горадзе з’явілася больш прапаноў для пражывання, у высокі сезон усё яшчэ не хапае месцаў у гасцініцах эканом-класа, распавядала галоўны спецыяліст аддзела спорту і турызму Гродзенскага гарвыканкама Анастасія Гліна.
