У Гродне прайшоў прафілактычны рэйд: супрацоўнікі ДАІ праверылі, як кіроўцы прапускаюць аўтамабілі спецслужбаў. Машына хуткай дапамогі з уключанымі маячкамі і сірэнай праехала па ажыўленых вуліцах горада ў суправаджэнні інспектараў.
Супрацоўнікі ДПС назіралі за рэакцыяй кіроўцаў і пешаходаў. Падчас праверкі двое аўтамабілістаў не саступілі дарогу хуткай. На іх склалі адміністрацыйныя пратаколы, паведамляе гродзенская міліцыя.
Падобныя рэйды ў горадзе праводзяць рэгулярна. Напрыклад, летам 2022 года ўсяго за 15 хвілін да адказнасці прыцягнулі трох кіроўцаў, якія не прапусцілі спецтранспарт.
Як тады адзначаў начальнік аддзялення агітацыі і прапаганды УДАІ УУС Гродзенскага аблвыканкама Андрэй Цыдзік, кіроўцам важна быць уважлівымі на дарозе і ўлічваць дзеянні іншых удзельнікаў руху.
— У адпаведнасці з дзейным заканадаўствам за непрадастаўленне перавагі існуе адміністрацыйная адказнасць. У адпаведнасці з часткай 10 арт. 18.13 Кодэкса аб адміністрацыйных правапарушэннях, якая прадугледжвае штраф ад 2 да 10 базавых велічынь і магчымасць пазбаўлення кіроўцаў права кіравання тэрмінам да 1 года, — казаў Андрэй Цыдзік.
