Бар «Фарадей» на Сацыялістычнай, 32 праводзіць рэбрэндынг. Сайт установы выдае памылку, а ў сацсетках гродзенцы паведамляюць, што ўстанова “ўжо некалькі тыдняў не працуе”.
Апошняе абнаўленне ў Instagram «Фарадея» было 6 лістапада 2025 — пісалі пра «Гастрафэст». У апісанні профіля таксама з’явілася аб’ява аб тым, што ўстанова часова не працуе.
Замест стымпанку – неон і вінтаж: якім будзе “Лэйбэл”
Верагодна, у бары вырашылі правесці рэбрэндынг — рыхтуюцца да адкрыцця ўстановы «Лэйбэл». Уладальнікі апісваюць яго як “бар з характарам”.
Пакуль збіраюць каманду, якім будзе меню – яшчэ незразумела. Мяркуючы па Instagram «Лэйбэл», ва ўстанове зменяць інтэр’ер і атмасферу. Будуць выкарыстоўваць вінтажныя дэталі, постэры і неон. Але пакуль уладальнікі публікуюць фота з інтэр’ерамі “Фарадэя”.
«Вас чакае мноства лакацый і разнастайных залаў. Для тых, хто любіць адасобленую атмасферу — утульныя куткі з мяккімі канапамі і прыглушаным святлом. Для аматараў зносін — прасторныя залы з агульнымі сталамі і дынамічнай абстаноўкай. Ёсць таксама стыльныя VIP-зоны для асаблівых сустрэч і расслабленага адпачынку», — пішуць уладальнікі.
Установа належыць прыватнаму прадпрыемству “Валфед”, якое спецыялізуецца на гандлі ежай, напоямі і тытунем. “Фарадеем” валодала ТАА “Эпсилон групп”.
Бар «Фарадей» прапрацаваў каля 8 гадоў — яго адкрылі на Сацыялістычнай, 32 на месцы былога паба «Pub 32». Установу аформілі у стылістыцы стым-панку – мэблю і дэталі інтэр’еру выраблялі ўручную.
Меню складалася з бургераў, ролаў, салат, супоў і піўных закусак. Таксама падавалі алкаголь – кактэйлі і піва.
Чытайце таксама: Punk Roll у Гродне аднавіў працу – раней гараджане скардзіліся на атручэнні
