Дырэктар установы адукацыі карыстаўся службовым камбайнам у асабістых мэтах, а намеснік другога ў парушэнне закону працавала старшынёй ЖБВК. Такія парушэнні выявіла пракуратура Гродзенскай вобласці падчас праверкі кіраўнікоў - чатыром з іх вынеслі папярэджанні.
Пракуроры Гродзенскай вобласці праверылі, як у адукацыі змагаюцца з карупцыяй. Яны выявілі карупцыйныя злачынствы і парушэнні заканадаўства пры рэалізацыі дзяржпраграм і інвестыцыйных праектаў. А камісіі па супрацьдзеянні карупцыі працуюць фармальна і дублююць мерапрыемствы з году ў год.
Так намеснік загадчыка адной з устаноў адукацыі паралельна працавала старшынёй ЖБВК — жыллёва-будаўнічага вытворчага кааператыву. Пры гэтым па падпісаных абавязацельствах яна не мела права выконваць іншую аплатную працу.
У іншым раёне вобласці дырэктар установы адукацыі браў збожжаўборачны камбайн для сваіх мэт, а таксама выкарыстаў падначаленага ў працоўны час. Акрамя таго, кіраўнік разам з сынам незаконна карысталіся службовым транспартам. З кіраўніка спагналі кошт выкарыстання службовай тэхнікі - амаль 700 руб.
У іншых установах адукацыі пракуратура выявіла парушэнне заканадаўства аб закупках, дэклараванні даходаў і маёмасці, прыём на працу блізкіх сваякоў.
Чытайце таксама: Карупцыя ў Гродне расце: больш за ўсё злачынстваў у аграрнай сферы, гандлі і будаўніцтве
