Уладальніку гродзенскага навінавага агрэгатара Сяргею Чабоцьку прысудзілі 3,5 гады калоніі і штраф у 1000 базавых велічынь (42 тыс. руб.). Як паведамляюць крыніцы Hrodna.life, пракурор запытваў для Чабоцькі чатыры гады зняволення.
Чабоцьку затрымалі 23 кастрычніка 2024. Тройчы судзілі: за распаўсюд экстрэмісцкіх матэрыялаў і «пікет» у інтэрнэце.
Вядома, што першапачаткова Чабоцьку асудзілі па арт. 19.11 ч. 2 КаАП «Распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць».
Пасля адбыцця арышту Чабоцька не выйшаў на волю. Яго абвінавацілі па арт. 361−1 КК «Стварэнне экстрэмісцкага фарміравання або ўдзел у ім».
У кастрычніку 2024 года праўладныя медыі паведамілі, што інтэрнэт-рэсурс s13 прызнаны экстрэмісцкім па заяве пракурора Гродна.
Як пасля пісаў праўладны Telegram-канал «Гродненские сливы», s13.ru у 2020 нібыта актыўна публікаваў матэрыялы апазіцыі, а ўладам і праўладным актывістам адмаўляў у публікацыі. На думку аўтараў, тады партал ператварыўся ў «навіновы агрэгатар прыхільнікаў змен».
S13 быў буйным гульцом на медыярынку
Да ліквідацыі партал быў адным з найбуйнейшых на гродзенскім медыярынку. Пасля выбараў 2020 года перастаў перадрукоўваць медыі, прызнаныя экстрэмісцкімі, і часам бескрытычна рэпосціў праўладныя і дзяржаўныя тэксты.
Сайт працаваў амаль 20 гадоў. У рубрыцы «Папулярнае» тэксты збіралі па 20−100 тыс. праглядаў. У Instagram было 82 тыс. падпісчыкаў, у Telegram — 14 тыс.
За двое сутак пасля прызнання экстрэмісцкімі матэрыяламі страціў дзясяткі тысяч падпісчыкаў у сацсетках. Цяпер сайт недаступны.
