Сілавікі прыйшлі да маці гродзенскага журналіста і прадпрымальніка Андрэя Мялешкі. Яны прасілі маці і сястру перадаць яму, каб гродзенец звярнуўся ў так званую камісію па вяртанні. Пра гэта журналіст расказаў на сваёй Facebook-старонцы.
«Не даждёцеся ку*вы», — пракаментаваў просьбу сілавікоў Мялешка. Журналісту таксама стала вядома, з-за якога крымінальнага артыкула сілавікі прыйшлі да ягонай маці. «Розныя часткі 361», (артыкул КК, верагодна, ч. 4 — «Садзеянне экстрэмісцкай дзейнасці»).
Андрэй Мялешка — журналіст недзяржаўных медыя. З’ехаў з Беларусі ў 2021 годзе, калі яго выклікалі на допыт адразу тры службы. Жыў у Грузіі з сям’ёй. Адкрыў там краму беларускай сімволікі.
У верасні 2024 года Мялешку дэпартавалі з Грузіі, разам з ім была непаўналетняя дачка Аляксандра. У дакументах, якія прадаставілі спецслужбы Грузіі, прычына аб забароне на ўезд у краіну не тлумачылася.
Цяпер журналіст разам з дачкой жыве ў Польшчы.
Чытайце таксама: Купа грошай з шуфляды і кім прыходзіцца гарадзенец гарадзенцу. Бізнесмены ў эміграцыі - аб (не)супадзеннях чаканняў і рэальнасці
