У ноч з 11 на 12 верасня Польшча закрыла аўтамабільныя і чыгуначныя пераходы на мяжы з Беларуссю. Сітуацыя, калі былі б закрытыя ўсе КПП на мяжы паміж дзвюма краінамі, адбываецца ўпершыню з 1991 года. Рэдакцыя Hrodna.life паглядзела, як выглядаюць закрытыя пагранпераходы, у якіх некалі бурліла прыгранічнае жыццё. У Гродзенскай вобласці функцыянавалі два буйныя пераходы — Брузгі і Бераставіца.
Гісторыя паступовага закрыцця памежных пераходаў на мяжы з Польшчай
9 верасня Польшча абвясціла пра часовае закрыццё мяжы з Беларуссю з-за вучэнняў «Захад-2025». Калі прапуск адновяць, пакуль невядома: улады заявілі, што рух адновяць толькі тады, калі будуць цалкам упэўнены ў бяспецы.
На момант прыняцця гэтага рашэння на мяжы дзейнічалі толькі два пункты пропуску: аўтамабільны «Брэст» (Тэрэспаль) і грузавы «Казловічы» (Кукурыкі). Акрамя таго, функцыянавалі чыгуначныя пераходы — але толькі для грузаў.
Яшчэ некалькі гадоў таму трапіць у Польшчу можна было і праз іншыя КПП. Адным з самых загружаных лічыўся аўтамабільны пераход Бераставіца — Баброўнікі. Аднак 10 лютага 2023 года яго закрылі рашэннем міністра ўнутраных спраў Польшчы. Нагодай стаў прысуд журналісту польскага паходжання Анджэю Пачобуту, якому ў Беларусі прызначылі восем гадоў пазбаўлення волі.
Да закрыцця «Баброўнікі» былі ключавой кропкай у Гродзенскай вобласці: толькі ў снежні 2022 года праз гэты КПП у абодва бакі прайшло амаль 111 тысяч чалавек. Прычым ён заставаўся адзіным буйным пераходам у рэгіёне пасля закрыцця ў 2021 годзе КПП «Брузгі» — «Кузніца Беластоцка» на фоне міграцыйнага крызісу.
Раней, у 2020 годзе, з-за пандэміі COVID-19 працу спынілі памежныя пункты Палоўцы — Пясчатка і Славатычы — Дамачава. У той жа перыяд (таксама з-за сітуацыі з ковідам) былі спынены пасажырскія чыгуначныя зносіны паміж Польшчай і Беларуссю. Іх дагэтуль не аднавілі.
Некалі ажыўленыя памежныя пераходы паміж Польшчай і Беларуссю зараз пустыя.
І калі на памежным мосце праз Буг каля Брэста загараджальныя збудаванні з’явіліся толькі што, то для Брузгоў і Бераставіцы такая карціна стала звычайнай. У жніўні гродзенскі праўладны Telegram-канал «Пул 4» публікаваў відэа і фотаздымкі з закрытых КПП.
КПП «Брузгі» — «Кузніца Беластоцка» — новая дарога з боку Польшчы і зона чакання
Пакуль КПП Брузгі - Кузніца Беластоцка закрыты, польскі бок працягвае будаўніцтва хуткаснай магістралі S19 працягласцю больш за 580 км.
Дарога пройдзе ад Кузніцы на мяжы з Беларуссю праз тры ваяводствы — Падляшскае, Люблінскае і Падкарпацкае — да Барвінека на мяжы са Славакіяй. Участак ад Беластока да славацкай мяжы стане часткай міжнароднага маршруту Via Carpatia, транспартнага калідора, які злучае поўнач і поўдзень ЕС уздоўж усходняй мяжы.
Каля закрытага КПП ужо з’явілася новая чатырохпалосная дарога, а таксама зона чакання ў Вайноўцах (4 км ад мяжы), якой раней тут не было.
КПП Бераставіца-Баброўнікі: рэканструкцыя на беларускім баку
У памежным пераходзе каля Бераставіцы падчас прастою рамонтныя работы праводзіў беларускі бок.
Пункт пропуску даўно патрабаваў мадэрнізацыі, таму яго ўключылі ў Дзяржаўную праграму на 2021−2025 гады. Рамонтныя работы завяршылі ў лютым гэтага года, пасля чаго аб’ект урачыста адкрылі, хаця пункт пропуску яшчэ застаецца закрытым для руху.
Падчас рэканструкцыі пабудавалі асобныя выязныя каналы для грузавікоў і аўтобусаў, мадэрнізавалі модулі для размяшчэння мытнікаў і памежнікаў. Таксама з’явіліся аўтобусная зала афармлення і вагагабарытны комплекс.
Пасля адкрыцця «Бераставіцы» прапускная здольнасць пункта складзе 3,9 тыс. аўтамабіляў у суткі: 2,8 тыс. легкавых, 850 грузавых і 250 аўтобусаў.
