У кацельным цэху завода «Хімвалакно» ў Гродне 29 жніўня здарылася аварыя. Выбух адбыўся, калі паравы кацёл пераводзілі з прыроднага газу на дызельнае паліва. Працэдура была планавай. Двое супрацоўнікаў пацярпелі.
Адзін з мужчын атрымаў апёкі 4-й ступені. Гэта самая цяжкая ступень. Пры такім апёку тканіны гінуць, у тым ліку могуць быць пашкоджаны мышцы і косці.
На месцы аварыі працуе следча-аператыўная група — дакументуюць абстаноўку, апытваюць сведкаў і канфіскоўваюць дакументы, звязаныя з аховай працы.
«Хімвалакно» працягвае працу ў штатным рэжыме.
Аварыі здараліся і на іншых прадпрыемствах Гродна
У верасні 2022 на Гродна Азот два супрацоўнікі атруціліся аміякам — мужчын даставілі ў БСМП, адзін з іх упаў у кому.
Пацярпелымі аказаліся браты Андрэй і Сяргей Марцінчыкі - яны працавалі прамысловымі альпіністамі. Па стане на люты 2022 года Андрэй аднавіўся не да канца — ён меў патрэбу ў доглядзе. Сяргей адчуваў сябе нармальна, але знаходзіўся дома і не працаваў. Наконт кампенсацыі або ўзбуджэння якой-небудзь крымінальнай справы з імі не звязваліся.
Чытайце таксама: На выхадных у Гродне здарыўся пажар на могілках
