Гродзенец паскардзіўся, што ў адным з двароў Грандзічаў займаюць парковачныя месцы для людзей з інваліднасцю. Пасля рэйду ДАІ кіроўцы атрымалі штрафы, а месцаў на паркоўцы стала больш, піша «Авто Гродно».
Адзін з вадзіцеляў з інваліднасцю прыехаў у двор у Грандзічах і не знайшоў свабодных месцаў на спецпаркоўцы. Ён паскардзіўся ў ДАІ. Інстанцыя правяла рэйд. Мясцовая жыхарка Дар’я расказала, што «ўсім жыхарам аўтаматычна выдалі штрафы». Пасля гэтага месцы для людзей з інваліднасцю «прыкметна вызваліліся».
Аб праблеме з занятымі месцамі ў дварах Грандзічаў гаворыць і гродзенец Валерый. У мужчыны парушэнні апорна-рухальнага апарата, але машыну на спецыяльнай стаянцы ён пакідае рэдка — свабодных месцаў амаль няма.
— Ні з кім з гэтай нагоды не лаяўся, бо стараюся не ўвязвацца ў канфлікты без вострай неабходнасці. Хаця ў Грандзічах месцаў для інвалідаў хапае. І за паркоўку раней не штрафавалі, а цяпер узяліся, — адзначае Валерый.
Гродзенец дадае, што штрафы не вырашаюць праблему цалкам — месцы ўсё роўна займаюць. Падобную сітуацыю Валерый назірае і каля магазінаў.
У ДАІ адзначаюць — гараджане паркуюцца на месцах для людзей з інваліднасцю і тлумачаць гэта тым, што «спяшаліся, больш не было месцаў, спыніліся на хвіліначку».
За неправамерную стаянку на месцы для людзей з інваліднасцю можа пагражаць штраф у памеры 2 базавыя велічыні (84 руб.). Згодна з ПДР, паркавацца на такіх месцах могуць кіроўцы, у якіх ёсць спецыяльны дазвол і знак «інвалід» на машыне.
Чытайце таксама: Гродзенцы скардзіліся, што ў Грандзічах займаюць парковачныя месцы для людзей з інваліднасцю. Праблему вырашылі радыкальна
