У Зэльвенскім раёне, каля вёскі Клепачы, хтосьці замест правільнай ўтылізацыі каністраў ад ядахімікатаў проста спальваў іх у полі. Беларуска паскардзілася на гэта ў TikTok. Па яе версіі, гэта рабіла мясцовая гаспадарка. Праз некалькі дзён мясцовая прыродаахова адрэагавала на ролік. Спецыялісты расказалі, хто ўсё гэта зрабіў і што будзе з вінаватымі.
Аўтарка відэа расказала, што частка каністраў валялася проста каля дарогі, а частка спальвалася ў полі. Пры гэтым каля вогнішча з пластыкавай тарай нікога не было, а ад вогнішча ішоў едкі чорны дым. Карыстальнікі TikTok актыўна каментавалі відэа. Адны раілі выклікаць МНС і напісаць заяву ў міліцыю, іншыя казалі, што нічога страшнага не адбываецца.
— Госпадзі, людзі, што з вамі? Ад гэтых каністраў нічога не будзе. Іх прамываюць. А калі побач з вёскай апырскваюць палі — гэта нашмат шкадней, — напісаў адзін з карыстальнікаў.
Хтосьці адзначыў, што тара ад ядахімікатаў павінна быць утылізавана належным чынам, і гэта сапраўды не спальванне ў полі.
— Утылізацыя каністраў павінна праходзіць у спецыяльных арганізацыях. І нават калі каністры прамываюць, гэта не значыць, што там зусім нічога не засталося. Хімія захоўваецца гадамі на розных паверхнях, нават у глебе, — напісаў іншы карыстальнік.
Тое, што каністры ад хімікатаў, можна зразумець па надпісах на тары. Напрыклад, ёсць ёмістасці з надпісам «Лакаль-Бор» — гэта мікраўгнаенне, якое ўжываецца для рапсу, буракоў і кармавой кукурузы. Або «Тайра» — гэта інсектыцыд, які ўжываецца для барацьбы з шкоднікамі.
У інструкцыі да дадзенага прэпарата напісана, што тара з-пад пестыцыду падлягае тэрмічнай ўтылізацыі або вывазу ў спецыялізаваныя месцы. Таксама каністры, у якіх захоўваліся хімікаты, трэба прамываць. Прамыванне павінна праводзіцца тры разы, з устрэсваннем пасля кожнага напаўнення вадой, каб выдаліць рэшткі ўгнаення.
Прыродаахова адрэагавала на відэа ў TikTok
На відэа звярнула ўвагу Зэльвенская раённая інспекцыя прыродных рэсурсаў і аховы навакольнага асяроддзя.
Аказалася, што спальваннем пустых каністраў ад ядахімікатаў займаўся сельскагаспадарчы філіял «Міжэрычы» ТАА «Біякам». Ён спецыялізуецца на вытворчасці прадукцыі раслінаводства і жывёлагадоўлі.
Пасля з’яўлення роліка спецыялісты прыродаахоўнай службы выехалі на месца, і пацвердзілі факт парушэння.
— У выніку вялікая колькасць шкодных рэчываў была выкінута ў атмасфернае паветра, што негатыўна паўплывала на навакольнае асяроддзе дадзенай мясцовасці. Акрамя гэтага, дадзеныя каністры павінны былі быць сабраны і перададзены спецыялізаваным арганізацыям для паўторнага выкарыстання. Нічога з гэтага зроблена не было, — распавёў начальнік Зэльвенскай раённай інспекцыі прыродных рэсурсаў і аховы навакольнага асяроддзя Генадзь Чыгрын.
Ён адзначыў, што кіраўніцтва філіяла «Міжэрычы» шчыра выбачаецца перад жыхарамі вёскі Клепачы за прычыненыя нязручнасці. З працаўнікамі філіяла, адказнымі за правядзенне ўтылізацыі каністраў ад ядахімікатаў, па яго словах, была праведзена праца. А сітуацыю прыродаахоўная служба ўзяла на маніторынг і асабісты кантроль.
Што пагражае парушальнікам?
Таксама Генадзь Чыгрын паведаміў, што месца, дзе спальвалі пустыя каністры, прывялі ў парадак.
У дачыненні да службовых асоб прадпрыемства і самой юрыдычнай асобы пачалі адміністрацыйны працэс па артыкуле 16.44 КаАП, частка 3 — «Парушэнне іншых патрабаванняў заканадаўства аб абыходжанні з адходамі».
Гэта азначае накладанне штрафу:
— на фізічных асоб да — 30 базавых велічынь,
— на індывідуальнага прадпрымальніка — да 100 базавых велічынь,
— на юрыдычную асобу — да 1000 базавых велічынь.
