З 12 чэрвеня па 15 жніўня пачынаюць прымаць дакументы для залічэння ў першыя класы. Якія спатрэбяцца дакументы, як аддаць дзіця ў школу не па месцы жыхарства, і што з узростам?
Якія дакументы патрэбны?
З 12 чэрвеня па 15 жніўня бацькам будучых першакласнікаў неабходна прынесці:
- заяву на імя дырэктара школы;
- медыцынскую даведку з заключэннем аб допуску да навучання;
- арыгінал пасведчання аб нараджэнні дзіцяці.
Дакументы можна прынесці ў залежнасці ад раскладу, пазначанага на сайце школы ці гімназіі. Іх прымаюць не толькі ў першай палове дня, але і ў другой, і нават у суботу. Браць з сабой дзіця неабавязкова.
Ці можна аддаць дзіця ў школу не па месцы жыхарства?
Калі бацькі хочуць аддаць дзіця ў школу ў іншым мікрараёне, ім трэба ў тыя ж тэрміны (12 чэрвеня — 15 жніўня) падаць заяву на асабістым прыёме ў дырэктара. Але ў дзяцей, якія жывуць у мікрараёне ўстановы адукацыі, ёсць перавага на паступленне там у 1-ы клас. Залічваць на пакінутыя вольныя месцы будуць з 16 па 28 жніўня 2025 года па чарговасці рэгістрацыі заяў.
Інфармацыю аб колькасці пададзеных дакументаў будуць штодзённа абнаўляць на сайтах школ: да 15:00 — па выніках першай змены прыёму, да 20:30 — па выніках другой змены.
Рашэнні аб тым, якія мікрараёны замацаваны за школамі і гімназіямі, можна знайсці на сайтах аддзелаў адукацыі, упраўленняў адукацыі райвыканкамаў і саміх навучальных устаноў.
З якога ўзросту можна аддаваць у школу?
У першыя класы на 2025/2026 навучальны год прымуць дзяцей, якім на 1 верасня 2025 года спаўняецца 6 і больш гадоў. Разам з тым па жаданні аднаго з законных прадстаўнікоў дзіцяці дапускаюць прыём у першы клас дзяцей, якім 6 гадоў споўніцца да 31 снежня 2025 года.
Школ і вучняў у вобласці стала менш
У новым навучальным годзе ў Беларусі будуць працаваць 2627 школ і гімназій. У іх пойдуць каля 1,05 млн вучняў, сярод якіх 90 тыс. першакласнікаў. У Гродне — больш за 40 устаноў агульнай сярэдняй адукацыі (школ і гімназій).
У Гродзенскай вобласці будуць функцыянаваць 297 школ усіх тыпаў. У іх пойдзе 118 тыс. школьнікаў, з якіх 10 тыс. будуць першакласнікамі. Для параўнання, у 2023/2024 навучальным годзе ў вобласці было 304 школы, больш за 120 тысяч школьнікаў і больш за 11 тысяч першакласнікаў.
У галоўным упраўленні адукацыі Гродзенскага аблвыканкама працуе «гарачая лінія» па пытаннях прыёму ў першыя класы ўстаноў агульнай сярэдняй адукацыі Гродзенскай вобласці - тэлефон 8 (0152) 77 04 21.
Чытайце таксама:
