Дабрачынны дзень стрыжак праводзіць 9 чэрвеня філіял Black Eagle на праспекце Янкі Купалы, 67. Усе сабраныя сродкі перададуць сям’і 8-гадовага Вані Сцяцэнкі. Хлопчыку дыягнаставалі міядыстрафію Дзюшэна – на выратаванне трэба $2,9 млн.
«Усё, што ад вас патрабуецца, – прыйсці на любую паслугу з нашага прэйскуранта», – паведамляюць уладальнікі Black Eagle у Instagram.
Запісацца можна па тэлефоне +375 33 33 222 16 або анлайн па спасылцы. Арганізатары абавязваюцца перадаць усю выручку за гэты дзень сям’і Вані.
Падобную акцыю правёў 7 чэрвеня яшчэ адзін гродзенскі барбершоп – Black Room. Колькі ўдалося сабраць – пакуль не паведамляецца.
Напярэдадні бацька хлопчыка апублікаваў у Instagram зварот да жыхароў Гродна і ўладаў:
«Сёння мы і наша сям’я звяртаемся менавіта да вас, з просьбай аб дапамозе ў зборы на лячэнне нашаму сыну Сцяцэнку Івану. Лекі каштуюць 2,9 мільёна долараў – гэтая сума непад’ёмная для нашай сям’і. Мы просім вас аб дапамозе фінансавай і інфармацыйнай».
З-за хваробы Ваня ўжо не можа самастойна хадзіць. Усе варыянты далучыцца да збору сродкаў для Вані можна знайсці тут.
Міядыстрафія Дзюшэна – рэдкае генетычнае захворванне, пры якім мышцы паступова губляюць сілу і атрафуюцца. Хвароба праяўляецца ў хлопчыкаў з-за зламанага гена, які адказвае за выпрацоўку бялку дыстрафіна. Ён неабходны, каб мышцы чалавека фармаваліся і працавалі правільна. Без лячэння большасць пацыентаў не дажываюць да 25 гадоў.
Сям’я збірае сродкі на прэпарат Elevidys – адзін з самых дарагіх у свеце. Ён не лечыць хваробу цалкам, але здольны запаволіць яе развіццё і падоўжыць жыццё дзіцяці. У Беларусі ўжо быў вопыт закрыцця падобнага збору – у студзені гэтага года беларусы сабралі 2,9 мільёна долараў для Арцёма Пад’ялоўскага з Магілёва з такім жа захворваннем. Збор закрылі за 9 месяцаў.
