У Гродне абвясцілі новы конкурс на распрацоўку перадпраектнай дакументацыі для парку на Фолюшы. Паводле планаў, у парку будзе некалькі пляцовак для адпачынку, нестацыянарнага гандлю, веладарожкі, алеі, пітныя фантанчыкі, паркоўка.
UPD 24 снежня. Ужо паўгода ў Гродне не могуць выбраць распрацоўніка дакументаў для парку на Фолюшы. На першую закупку ніхто не заявіўся. З другой выбралі мінскае ТАА “ЭКСПЕРТЭНЕРГА”. Дамову з ім скасавалі ў аднабаковым парадку, бо яны папросту не даслалі дакументацыю.
Была і трэцяя спроба. “Тапаззападінжынірынг” да конкурсу не дапусцілі, бо яны не пацвердзілі рэпутацыю і досвед і няправільна разлічылі суму. “Белкамунпраект” дапусцілі, але пераможцам не выбралі. Верагодна, будзе чарговая закупка.
Згодна з апошнім планам, у праекце для парку трэба прадугледзець:
- паркоўкі для машын і велапаркоўкі;
- пляцоўкі для размяшчэння нестацыянарнага гандлю;
- прагулачныя алеі з лавамі і сметніцамі, веладарожкі;
- пляцоўкі для актыўнага адпачынку моладзі і пажылых людзей са спартовым абсталяваннем;
- абсталяваную гульнявую пляцоўку для дзяцей;
- пляцоўкі для гульняў у валейбол, баскетбол альбо міні-футбол;
- пляцоўкі для размяшчэння пераносных грамадскіх туалетаў;
- добраўпарадкаванне пляжнай зоны;
- масткі праз Ласасянку;
- уладкаванне зоны ціхага адпачынку;
- вонкавае асвятленне сквера;
- азеляненне тэрыторыі: уладкаванне траўніка, пасадку дрэў і кустоў;
- пітныя фантанчыкі.
Тэрыторыя парку ахоплівае так званы Ніжні Фолюш (былы “Шанхай”). Гэта спальны раён, непадалёк – рака Ласасянка і яр. Цяпер зараснікі ўшчыльную падступаюць да дамоў. Крыху ніжэй стаялі самавольна пастаўленыя гаражы і гаспадарчыя пабудовы. Іх зносілі гэтай вясной.
На распрацоўку перадпраектнай дакументацыі выдаткуюць 223 904 руб., раней планавалі вылучыць 29 472 руб. Пакуль Гродзенская гарадская жыллёва-камунальная гаспадарка збірае прапановы. Зоймуцца распрацоўкай з 30 чэрвеня па 29 верасня 2025 года.
