Штонядзелю да 31 жніўня ў гродзенскім парку Жылібера будзе граць жывая музыка: Гродзенская капэла, вучні дзіцячых музычных школ №1 і №2 і ваенныя духавыя аркестры. Насамрэч, гэтай традыцыі ў Гродне ўжо больш за сто гадоў – такія выступы ў парку ладзілі пры паляках.
Канцэрты будуць адбывацца каля вялікага фантана за Тэатрам лялек і доўжыцца гадзіну – з 14.00 да 15.00. Уваход на імпрэзу – вольны.
Першы выступ у парку прайшоў 18 траўня і, нягледзячы на халоднае надвор’е, сабраў некалькі дзясяткаў гледачоў. Грала Гродзенская капэла, і гродзенцы рознага веку танцавалі пад жывую музыку.
@irinain2 #гроднобеларусь #180525 #паркжилибера #танцуютподоркестр #оркестриграет #гроднотикток #люблюгродно ♬ оригинальный звук – Ирина Пашпекина
Канцэрты гродзенскіх калектываў каля фантана ладзілі і ў 2017 годзе.
Жывая музыка ў парку Жылібера гучала яшчэ 100 гадоў таму. У 1924 годзе у парку Жылібера па панядзелках у 17−19 гадзін выступаў аркестр 81 пяхотнага палка, а па пятніцах у той жа час — аркестр 76 пяхотнага палка. Практыка бясплатных канцэртаў у парку для гараджан дзейнічала тады ў Гродне ўжо некалькі гадоў. Тады такія канцэрты вайсковых аркестраў ладзілі “з мэтаю адраджэння музычнай культуры ў горадзе”. Выступы праходзілі ў гарадскім садзе – цяперашнім парку Жылібера. На час пасляабедзенных лекцый у гімназіі Адама Міцкевіча, якая тады месцілася ў сённяшнім будынку аграрнага ўніверсітэта на рагу Акадэмічнай і 1 Мая, канцэрты пераносілі ў Швейцарскую даліну. Таксама канцэрты праходзілі кожную сераду ў раённым шпіталі.
