У Гродне на продаж выставілі начны клуб «Калізей 2000». Ён прадаецца як гатовы бізнес. Паглядзелі, што ўваходзіць у цану і што пра клуб думаюць у горадзе.
Клуб знаходзіцца ў цэнтры Гродна, на Карла Маркса, 31 — каля Дома сувязі. Установа была заснавана ў 2000 годзе. У 2022 годзе клуб прайшоў рэбрэндынг, тады ж абнавілі інтэр'ер і ўсталявалі новае абсталяванне.
Клуб займае плошчу 500 м² і мае двухузроўневую прастору. У ім можна праводзіць розныя мерапрыемствы ад карпаратываў і вяселляў да канцэртаў і тэматычных вечарынак.
Што ўваходзіць у кошт?
У продаж уваходзіць:
- цалкам абсталяваная кухня;
- барнае, светлавое і музычнае абсталяванне;
- ліцэнзіі і ўсе неабходныя дакументы;
- сфармаваны персанал.
Пакупніку таксама абяцаюць базу пастаянных кліентаў, вядомасць установы і «выдатную рэпутацыю», адзначаюць зручную транспартная даступнасць.
У аб’яве аб продажы адзначана, што клуб прыбытковы. За клуб хочуць $ 324 000.
Што ж па водгуках?
Рэйтынг клуба ў Google — 3,1, на Яндекс.Картах — 3,6. У водгуках наведвальнікі скардзіліся на рэкламу дзіцячых дзён нараджэння і «раставога мядзведзя, які распіхвае наведвальнікаў» на танцпляцы, але адзначалі ўмераныя цэны і стараннасць дыджэя. «Перажытак мінулага», — напісала Вераніка А. Многія пісалі пра невялікую колькасць наведвальнікаў. «Музыка зусім не для людзей 30+. Хутчэй для ўзросту 50+», — напісала Ганна Р. і пахваліла ахову і каву.
«У навагоднюю ноч да ~2 гадзін з наведвальнікаў было 4 пенсіянеры. Музыка адпавядае кантынгенту: Шатуноў, Меладзэ, Лепс, часам трапляліся пасрэдныя трэкі сучаснага ўзору», — напісаў карыстальнік пад нікам V SHAG тры месяцы таму.
«За ўсю ноч DJ-Кал паставіў каля 5 нармальных трэкаў. Аднак у клубе нармальная святлатэхніка, дымавая машына і прыстойнае візуальнае афармленне. Каб сядзець за сталом у напаўпустым клубе, трэба заплаціць 300 руб. У іншым выпадку задавольвайцеся металічнай табурэткай. Кактэйлі дарагія, некаторыя па 30 руб. за келіх. Пры вострым жаданні (а яно будзе) можна замовіць музыку, але гэта абыдзецца ў 20 руб.»
А вось год таму арганізацыю навагодняга карпаратыву ацанілі як выдатную.
Чытайце таксама:
