Будынак былой камендатуры (палац Чацвярцінскіх) у парку Жылібера набыў канчатковыя рысы пасля абнаўлення. Праўда, новы ўласнік абмежаваўся капрамонтам будынка — поўнавартаснай рэканструкцыі не адбылося.
Першапачатковы выгляд будынку не сталі вяртаць, каб не ўваходзіць у масу даследванняў і узгадненняў, піша канал Urban Hrodna. Тым не менш, будынак уратаваны ад разбурэння.
На момант пачатку працаў у падвалах было поўна вады, якая ўзялася невядома адкуль і якую давялося прыбіраць — гэта ўскладніла ўсе працы, тлумачаць у канале.
На будынку засталіся савецкага часу атыкі. Шлемападобныя купалы, якія былі раней, і колішнюю балюстраду аднаўляць не сталі. Часткі фасада пафарбавалі ў розныя колеры.
Што яшчэ там збіраліся зрабіць
Будынак 1775—1781 гадоў быў узведзены для медычнай акадэміі Тызенгаўза і быў часткай Гарадніцы. Там месціўся палац Святаполк-Чацвярцінскіх, пазней — розныя арганізацыі і нават арэнднае жытло. Пасля Другой сусветнай там знаходзілася вайсковая камендатура.
З 2014 года будынак пуставаў. З 2016 года горад рабіў шматлікія спробы яго прадаць. Нарэшце ў траўні 2020 года палац купіў уласнік гродзенскага парку атракцыёнаў за 1,69 млн руб. Праз год, у час распрацоўкі праекта для гістарычнага будынка і тэрыторыі вакол яго, новы ўласнік казаў, што плануе аднавіць камендатуру такой, які ён быў. Пры гэтым ён адзначаў, працэс узгаднення займае шмат часу: «Колер даху мы ўзгаднялі два месяцы». Каля палаца планавалі ўзвесці аранжарэю і ўладкаваць грамадскую прастору, прыбраўшы плот паміж палацам і паркам Жылібера.
