Лакацыі паводле фільмаў пра вайну, парад і ўзяцце Тэкстыльшчыкаў замест Рэйхстага. Што плануюць у Гродне на 9 траўня?

У Гродне рыхтуюцца да святкавання 80-годдзя Перамогі ў Вялікай Айчыннай вайне. Мерапрыемствы аб’яднаюць пад канцэпцыяй кіно: лакацыі ў цэнтры прысвецяць васьмі фільмам пра вайну. А напярэдадні, 4 траўня, на Савецкай плошчы будуць рэканструяваць узяцце Рэйхстага. Замест яго возьмуць Палац культуры тэкстыльшчыкаў.

Цыкл мерапрыемстваў да свята назавуць «У кожным кадры Перамога», распавёў начальнік аддзела культуры Гродзенскага гарвыканкама Дзяніс Чарняк для «Гродна Плюс». Такую назву выбралі, бо ў Гродне знята больш за 50 фільмаў, у тым ліку і пра Вялікую Айчынную вайну. Уся святочная праграма будзе звязана з тэмай ваенных фільмаў, а лакацыі ў цэнтры горада ператвораць у сцэнічныя пляцоўкі для ўзнаўлення іх эпізодаў.

Напярэдадні свята, 4 мая, на плошчы Савецкай пройдзе рэканструкцыя ўзяцця Рэйхстага. У гэтым эпізодзе будуць удзельнічаць ваенныя ў форме перыяду Другой сусветнай вайны. У якасці Рэйхстага выкарыстоўваюць Палац культуры тэкстыльшчыкаў. Таксама на прыступках «Рэйхстага» выступяць артысты.

Праграма на 9 траўня

Асноўныя ўрачыстасці стартуюць 9 траўня з шэсця «Беларусь памятае», якое пройдзе ад плошчы Савецкай да плошчы Леніна. Пасля шэсця адбудзецца мітынг, а затым адкрыюцца тэматычныя лакацыі ў цэнтры горада: на плошчы Леніна, у парку Жылібера, на вуліцы Савецкай і на Савецкай плошчы.

У гэтым годзе ў Гродне арганізуюць парад ваеннай тэхнікі, які не праводзіўся ў апошнія гады. У ім плануюць удзел каля 30 адзінак тэхнікі.

Навінкай свята стане «Вуліца кіно» на вуліцах Савецкай і Ажэшкі. Тут будуць узнаўляць сцэны з васьмі вядомых фільмаў пра Вялікую Айчынную вайну.

Асноўная сцэна будзе на плошчы Леніна. На працягу ўсяго дня там будзе ісці канцэртная праграма. Увечары выступіць хэдлайнер — папулярная артыстка з Расіі.

На Савецкай плошчы арганізуюць кінатэатр пад адкрытым небам, дзе ўвесь дзень можна будзе глядзець фільмы пра Вялікую Айчынную вайну.

Чытайце таксама: Сцяг Перамогі над драмтэатрам, каша ў кубачках і сплаў з партрэтамі. Як Гродна адзначыў Дзень Перамогі