У 2024 годзе ў Гродзенскай вобласці планавалі здаць у эксплуатацыю 479,2 тыс. кв. метраў жылля, але па факце пабудавалі 482 тыс. кв. метраў. Колькі вырашылі будаваць у гэтым годзе і колькі трэба?
У 2025 годзе ў Гродзенскай вобласці вырашылі будаваць менш — 456 тыс. кв. метраў жылля. Чыноўнікі зразумелі, што ў планы пяцігодкі яны дакладна ўпісваюцца: да 2025 года ў рэгіёне была задача ўвесці 1,817 млн кв. метраў, але фактычна ўжо пабудавана 1,875 млн кв. метраў, расказаў начальнік аддзела жыллёвай палітыкі Гродзенскага аблвыканкама Аляксандр Капраноў для БелТА.
Чарга на жыллё і горад-спадарожнік
У Гродзенскай вобласці ў чарзе на жыллё стаіць больш за 50 тыс. чалавек, але лік тых, хто мае патрэбу, скарачаецца, асабліва сярод шматдзетных сем’яў. Актыўна забудоўваюць горад-спадарожнік Скідзель у 30 км ад Гродна. Па ўсёй краіне на пачатак 2024 года ў чарзе на жыллё стаялі 569,111 тыс. сем’яў. З 2011 года іх лік знізіўся на 30%. Сярод тых, хто стаіць на ўліку, 35,7 тыс. было шматдзетных сем’яў. Усяго ў Беларусі ў 2024 годзе пабудавалі 4,39 млн кв. метраў агульнай плошчы жылля, а планавалі - 4,4 млн кв. метраў.
За 2023 год у Гродзенскай вобласці ўвялі ў эксплуатацыю 465,9 тыс. кв. метраў жылля — гэта менш, чым у 2024 годзе, але больш, чым плануецца ў 2025. З іх амаль палову (200,1 тыс. кв. метраў) тады пабудавалі для тых, хто мае патрэбу, а 240,5 кв. метраў жылля прыйшлося на Гродна.
Чытайце таксама: Кватэры ў Гродне працягваюць даражэць, але Брэст усё роўна абганяе. Параўналі цэны на жыллё ў Беларусі
