«Гродногаз» і «Гродна Азот». У Гродне створаць адзіную дзяжурна-дыспетчарскую службу: як яна будзе працаваць і чым дапаможа людзям

У Гродне створаць адзіную дзяжурна-дыспетчарскую службу (АДДС) на 16 арганізацый. Яна аб’яднае экстраныя службы і камунальныя арганізацыі горада. Разабраліся, навошта яна патрэбна, чым будзе карысная гродзенцам і як ёй карыстацца.

Рашэнне гарадскога выканкама аб стварэнні службы апублікавана на Нацыянальным прававым інтэрнэт-партале. У службу ўвойдуць:

• гарадскі аддзел па надзвычайных сітуацыях Гродзенскага абласнога ўпраўлення МНС РБ,
• РАУС Ленінскага і Кастрычніцкага раёнаў,
• Ленінскі і Кастрычніцкі аддзелы Дэпартамента аховы МУС РБ,
• ААТ «Гродна Азот»,
• завод «Хімвалакно»,
• Гродзенскі гарадскі раён электрычных сетак філіяла «Гродзенскія электрычныя сеткі» РУП «Гроднаэнерга»,
• філіял «Гродзенскія цеплавыя сеткі» РУП «Гроднаэнерга»,
• ПУ «Гроднагаз» РУП «Гроднааблгаз»,
• ДУКПП «Гроднаводаканал»,
• філіял «Гродзенская цеплаэлектрацэнтраль-2» РУП «Гроднаэнерга»,
• Гродзенская абласная станцыя хуткай медыцынскай дапамогі,
• Гродзенскі занальны вузел электрасувязі Гродзенскага філіяла РУП «Белтэлекам»,
• Аб’яднаная станцыя Гродна транспартнага РУП «Баранавіцкае аддзяленне Белчыгунка»,
• Гродзенская гарадская жыллёва-камунальная гаспадарка.

Большасць службаў і арганізацый, акрамя сілавікоў, водаканала і ЖКГ, былі падключаны да АДДС з іх згоды.

Дазваніцца ў службу можна будзе па нумарах 101 ці 112. Так жыхары змогуць хутка атрымаць дапамогу пры аварыях, пажарах, камунальных збоях і іншых экстраных сітуацыях.

Навошта патрэбна новая служба і як будзе працаваць

Галоўная задача новай службы — аператыўнае рэагаванне на надзвычайныя сітуацыі і прадухіленне праблем, якія парушаюць нармальнае жыццё гараджан.

Усе звароты паступяць у Цэнтр аператыўнага кіравання (ЦАУ) на Курчатава, 1. Там паведамленні прааналізуюць і перададуць у патрэбную службу. Напрыклад:

• калі адбыўся пажар — выклік накіруюць ратавальнікам,
• пры аварыі на водаправодзе — у «Гроднавадаканал»,
• пры адключэнні электрычнасці — у энергаслужбы.

АДДС забяспечыць хуткае ўзаемадзеянне паміж службамі, што павінна скараціць час рэакцыі на здарэнні. Гараджанам не трэба будзе шукаць кантакты розных арганізацый, а павінна хапіць аднаго званка.

Чытайце таксама: Паступае 800 званкоў у суткі. Як у Гродне працуе партал 115.бел