Адрамантуюць магілы савецкіх воінаў у вобласці. Паправіць швы каштуе $ 40 000

Брацкую магілу ў парку Жылібера ў Гродне і помнік на магіле Невядомага Салдата ў Навагрудку адрамантуюць у 2025 годзе. Магчыма, работы прымеркаваны да 80-годдзя Перамогі ў Другой сусветнай вайне.

Помнік у парку Жылібера чакае бягучы рамонт. На абліцоўванні стэлы выявілі каверны (пустэчы ў метале — Hrodna.life) больш за 1 см, скразныя расколіны, сколы і разбурэнні, адслаенне пліт ад паверхні, расслаенні каменя і іншыя пашкоджанні.

Спіс работ над магілай налічвае 35 задач. Вырабы і складовыя часткі дэмантуюць, пачысцяць, выраўнуюць і змантуюць. Работы пачнуць у канцы лютага і завершаць 20 красавіка. Цану пакуль вызначаюць — грошы выдзеляць з бюджэту горада.

З пачатку лютага ўжо пачалі рамантаваць Вечны агонь на помніку. Пры гэтым правядуць дбайнае абследаванне газаправода, які сілкуе агонь, абяцае «Гроднааблгаз». Работы праходзяць у рамках абвешчанага года добраўпарадкавання-2025, абвешчанага ў Беларусі, які назвалі часткай падрыхтоўкі да святкаванняў.

Таксама запланаваны бягучы рамонт помніка на магіле Невядомага Салдата ў Навагрудку. Ён знаходзіцца ў гарадскім скверы. Там знайшлі адслойванне гранітных пліт, разбурэнне швоў, стыкаў і прымыканняў асобных элементаў, разбурэнне бетоннай падставы.

Пры працы саму скульптуру не закрануць. А вось бетонавую падставу адрамантуюць і абліцуюць гранітнымі плітамі. Работы абыдуцца раённаму бюджэту ў 132 000 рублёў ($ 40 000). Іх пачнуць 10 сакавіка і скончаць 2 траўня.