У Гродне дзіцёнак два месяцы краў цацкі з крамы. Яго маці хоча падаць у суд на прадаўцоў

Дзіцёнак гродзенкі з сярэдзіны лістапада краў цацкі з крамы «Детмир» на вуліцы Агінскага. За два месяцы дзіцёнак вынес тавараў амаль на тысячу рублёў. Калі гродзенка выявіла, што цацкі былі скрадзены, яна вырашыла падаць заяву ў суд на супрацоўнікаў крамы. Па меркаванні жанчыны, адказнасць за знікненне тавара ляжыць на іх.

Гродзенка Фаіна апублікавала відэа ў TikTok 19 студзеня. Праз 20 гадзін пасля публікацыі ролік быў выдалены. За гэты час яго паглядзелі больш за сто тысяч карыстальнікаў, каля тысячы чалавек пакінулі свае каментарыі.

Машынкі краме вярнулі, а канструктар не атрымалася

Дзевяцігадовы дзіцёнак Фаіны прыносіў дадому новыя цацкі з сярэдзіны лістапада. Жанчына звярнула на гэта ўвагу, але дзіцёнак сказаў, што ўзяў іх у знаёмага хлопчыка. Па словах гродзенкі, яна не надала асаблівага значэння гэтаму эпізоду.

Ужо 18 студзеня да Фаіны звярнуўся прадавец з крамы «Детмир» і паведаміў, што яе дзіцёнак скраў цацкі. «Прынесла мне скрынкі ад гэтых цацак: там былі машынкі Hot Wheels і, атрымліваецца, Lego. Цацкі я аддала ёй, Lego мы не змаглі [аддаць — Hrodna.life], таму што яно разабранае», — распавяла ў відэа Фаіна. Гродзенка запэўніла, што за Lego яна «адназначна заплаціць».

Дзіцёнак вынес цацкі на суму амаль у тысячу рублёў

Фаіну абурыла, што яе дзіця два месяцы прыходзіла ў краму і бесперашкодна выносіла цацкі. Але прэтэнзіі ў гродзенкі ўзніклі не дзіцяці, а да супрацоўнікаў крамы.

«Атрымліваецца, яны сёння яго злавілі за руку і прывялі да мяне. Гэта значыць, на працягу двух месяцаў вы не бачылі <…> што ў вас тавару скралі на тысячу беларускіх рублёў?», — абураецца гродзенка.

Жанчына плануе судзіцца з крамай, бо лічыць сітуацыю надзвычайнай. Фаіна адзначае, што адказнасць за знікненне тавару ляжыць на супрацоўніках, адсутнасці ў краме камер і ахоўнікаў, што і стала прычынай крадзяжу. Пры гэтым гродзенка дадае, што ад адказнасці сыходзіць не збіраецца і будзе «адказваць за ўчынкі свайго дзіцяці».

За крадзеж з крамы сям’ю могуць паставіць у СНС

Згодна з беларускім заканадаўствам, дзеці, якія не дасягнулі 14 гадоў, не нясуць крымінальнай адказнасці. Пры гэтым сям’ю Фаіны могуць прызнаць сацыяльна небяспечнай (СНС). Гэтая працэдура прадугледжана для праблемных сем’яў. У тым ліку ў СНС трапляюць і непаўналетнія, абвінавачаныя ў крадзяжах, бойках і распіванні алкаголю.

СНС прадугледжвае праверкі сям'і з боку сацыяльных работнікаў і пастаноўку дзіцяці на ўлік у дзіцячы пакой міліцыі.

Чытайце таксама: Дзяцей у Гродне ставяць у СНС за палітычную актыўнасць бацькоў