Фото: pixabay.com
У Беларусі выраслі цэны на таксі, павялічыўся час чакання і прыкметна знізілася даступнасць машын. Прычынай стала ўступленне ў сілу ў лістападзе 2024 года новага закона аб дзейнасці таксі. Журналістка Hrodna.life спытала беларусаў з розных рэгіёнаў, як гэта паўплывала на іх жыццё.
З 1 лістапада ў Беларусі ўступілі ў сілу нормы ўказа Прэзідэнта № 32 ад 25 студзеня 2024 года, якія тычацца аўтамабільных перавозак пасажыраў у нерэгулярных зносінах. Цяпер перавозчыкі абавязаныя ўключаць у спецыяльны рэестр звесткі аб дыспетчары, кіроўцы, аўтамабілі і кампаніі. Таксама таксі павінны быць абсталяваны касавымі апаратамі з СККА (сістэма кантролю касавага абсталявання — Hrodna.life) і сістэмай відэафіксацыі ўнутры і звонку. Кіроўцы і кампаніі, не ўнесеныя ў рэестр, больш не могуць выходзіць на лінію.
Для падрыхтоўкі тэксту журналістка Hrodna.life апытала 30 беларусаў з Гродзенскай, Брэсцкай, Мінскай і Магілёўскай абласцей.
Новыя нормы выклікалі неадназначную рэакцыю сярод карыстальнікаў. Частка пасажыраў падтрымлівае ўзмацненне кантролю за кіроўцамі, лічачы, што гэта павысіць бяспеку паездак. «Добра, што кіроўцаў цяпер дбайней правяраюць. Гэта можа гарантаваць вялікую надзейнасць і бяспеку для пасажыраў», — упэўнены жыхар Гомеля.
Аднак большасць лічыць, што цяпер карыстацца таксі стала нязручна. «Дзяржава павінна прымаць законы, якія сапраўды паляпшаюць жыццё грамадзян, а не ўскладняюць яго», — адзначыла сталая кліентка таксі з Мінску. Многія лічаць, што новыя меры трэба скарэктаваць, каб забяспечыць камфорт і даступнасць перавозак для ўсіх.
Дзве траціны апытаных пасажыраў заўважылі, што кошт паездак значна ўзрос. Жыхар Мінску падзяліўся сваім досведам: «Раней за паездку я плаціў 6 рублёў, а цяпер даводзіцца аддаваць да 20. Гэта непад’ёмна для многіх людзей, асабліва пры рэгулярных паездках». Нават кароткія паездкі ў межах горада цяпер могуць каштаваць да 20 рублёў - раней такога не было нават у гадзіну пік, пацвярджае іншая суразмоўніца.
Павялічыўся час чакання таксі. «Раней машына прыязджала за 5−10 хвілін, а цяпер даводзіцца чакаць да 20 хвілін або больш. Гэта асабліва нязручна, калі трэба кудысьці спяшацца», — распавяла жыхарка Мінску.
Раз час чакання павялічылася ўдвая ці ўтрая, то людзям даводзіцца пераглядаць свае транспартныя звычкі. «Я стала больш карыстацца аўтобусамі і метро. Часам гэта нават хутчэй, чым чакаць таксі, асабліва ў гадзіны пік», — падзялілася досведам адна з апытаных. Іншыя дадаюць, што такія перамены сталі вымушанай мерай праз недаступнасць таксі.
У льготны перыяд да 1 лістапада ў Гродзенскай вобласці прайшлі рэгістрацыю 100% перавозчыкаў, 94% вадзіцеляў транспарту і 96% аўтамабіляў таксі. На пачатак студзеня ў рэестр уключылі 825 перавозчыкаў, 2800 кіроўцаў аўтамабіляў таксі і 1961 транспартны сродак, піша «Гродзенская праўда».
Журналісты дзяржгазеты знайшлі Віктара, які працуе кіроўцам таксі больш за пяць гадоў і задаволены адсутнасцю канкурэнцыі. «Па-першае, адсеяліся тыя, хто працаваў нелегальна. Па-другое, сфера таксі стала абсалютна празрыстай. Да таго ж тыя кіроўцы, для якіх таксі было крыніцай дадатковага заробку, больш не могуць падпрацоўваць без афіцыйнага працаўладкавання. Асабіста для мяне — гэта велізарны плюс, бо скарацілася канкурэнцыя», — сказаў Віктар.
Чытайце таксама:
Стваральнікі апублікавалі першую частку відэапраекта пра дрыфт, які здымалі восенню ў розных рэгіёнах Беларусі. Гродна…
У Жыровічах запланавалі рэканструкцыю Георгіеўскай царквы Свята-Успенскага Жыровіцкага манастыра. Гэта храм пабудаваны ў 1710 годзе…
Эдвард Станіслававіч Ародзь памёр 15 студзеня 2025 года, у бальніцы. Яму было 63 гады. Некалькі…
Хлопец не з'явіўся па позве ў ваенкамат. Супраць яго завялі крымінальную справу, але прыпынілі, пакуль…
З пачатку студзеня ў канале “ОАО «Гродно Азот» official" пачалі публікаваць пасты і відэа з…
Сайт па продажы білетаў «Атлас» у пілотным рэжыме тэсціруе сістэму дынамічнага цэнаўтварэння, калі кошт білета…