На Вялікай Траецкай нельга жыць з-за дрэннай энергетыкі: расіянка з’ездзіла ў Гродна і падзялілася ўражаннямі

Турыстка з Масквы Марыя наведала Мінск і Гродна ў зімовыя святы. Уражаннямі аб паездцы расіянка падзялілася на сваёй Facebook-старонцы. На думку жанчыны, Мінск — занадта пусты і манументальны, Гродна — інтэрнацыянальны горад, а Янка Купала — жанчына.

Мінск: пустыя, але чыстыя вуліцы

Першым прыпынкам у Марыі ў Беларусі стаў Мінск. Свой шпацыр яна пачала з вакзала. Праўда, адшукаць цікавых лакацый у жанчыны не атрымалася. «Нічога акрамя манументальнасці і пустаты. Шмат казіно. Чысціня на вуліцах, так, але яна толькі падкрэслівала гэтую безжыццёвасць прасторы», — апісвае свае ўражанні Марыя.

Турыстка прагулялася ўздоўж Плошчы Незалежнасці, а потым дайшла да парку імя Янкі Купалы. «Адкрыццё тыдня: Янка Купала — гэта мужчына, нацыянальны паэт», — падзялілася набытымі ведамі расіянка.

Гродна: шчаслівыя гараджане і культурны Новы год

Новы год Марыя сустракала ў Гродне. Для гэтага яна адправілася на Савецкую плошчу. Турыстка меркавала, што «грамадскае мерапрыемства будзе пашлаватым зборышчам людзей, якія выпілі». Аднак яе чаканні не спраўдзіліся. На думку Марыі, усё было «цывілізавана, душэўна і нават стыльна ўладкована».

Расіянку прыемна здзівілі палаткі з ежай і «добры рок-канцэрт». Найбольшае захапленне ў Марыі выклікаў «інтэрнацыянальны малады склад публікі». «Танцуючыя людзі розных нацыянальнасцяў і прадстаўнікі ўсіх рас, атмасфера прыязнасці і свята», — напісала ў Facebook Марыя.

Жыць на Вялікай Траецкай нельга — у гэтай вуліцы дрэнная энергетыка

Акрамя Савецкай плошчы турыстка наведала галоўныя славутасці Гродна: Каложскую царкву, Касцёл Панны Марыі Анёльскай (францысканскі касцёл на левым беразе Нёмана — ён падаўся расіянцы «самым душэўным з усіх»), а таксама Бернардынскі і Брыгіцкі касцёлы.

Жыла турыстка ў старым горадзе. Але, на думку Марыі, пры арэндзе кватэры трэба быць асцярожным — сяліцца на Вялікай Траецкай нельга.

«Старыя гарады становяцца скарбонкай у тым ліку і сумных гісторый. Усіх мы ведаць не можам, але ёсць відавочныя! Напрыклад, наўрад ці вы захочаце жыць у доме, які знаходзіўся ў яўрэйскім гета і дзе адбываліся катаванні і пакаранні. Таму я б выключыла для пражывання Вялікую Траецкую вуліцу на ўсім яе працягу і месцы, прылеглыя да яе аж да Савецкай і Замкавай вуліц», — падзялілася Марыя.

Чытайце таксама: Расіянку абурыла, што ў Гродне шмат касцёлаў, а людзі размаўляюць па-беларуску і па-польску