У Гродне на зімовыя святы можна арандаваць «інстаграмную» ёлку — піхту Нордмана

Такую паслугу прапануе сэрвіс пракату жывых дрэваў «ЭкаЁлачка». Праект працуе з 2019 года і належыць сям'і з Гродна. Сёлета ў «ЭкаЁлачкі» з’явілася яшчэ адна навінка — цяпер арандаваць ёлку на святы можна не толькі ў Гродне, але і ў Мінску, піша «Наша Ніва».

Арэнда жывой ёлкі - ад 50 да 220 руб.

Сёлета арэнда звычайнай ёлкі складае ад 50 да 220 руб., піхты Нордмана — 190−220 руб. Таксама прадугледжана зніжка для тых, хто скарыстаўся паслугамі «ЭкаЁлачкі» летась і пасля святаў дрэва выжыла.

«ЭкаЁлачка» дазваляе браць «сваё» дрэва штогод. Напрыклад, у гэтым годзе 11 снежня — апошні дзень, калі кліенты могуць арандаваць тую ж ёлку, якую заказвалі летась.

Развозіць ёлкі пачнуць бліжэй да святаў, а пакуль у акаўнце праекта паказваюць, як акуратна выкопваюць дрэвы і перамяшчаюць іх у кадкі - на кожную ёлку патрабуецца каля паўгадзіны.

Па тэме: Колькі каштуюць навагоднія ёлкі ў Гродне ў 2024 годзе?

Праз сэрвіс можна адсачыць, ці выжыла ваша ёлка

Праект «ЭкаЁлачка» запусціўся ў 2019 годзе. Тады гродзенцы высадзілі каля 1000 ёлак у Каробчыцах. Планавалася, што праз 7−8 гадоў дрэвы можна будзе ссекчы і прадаць да зімовых святаў.

З-за вялікага попыту сям'і прыйшла ідэя, што можна зрабіць эка-сэрвіс пракату ёлак — пастаўляць дрэвы ў кадках, каб пасля святаў высаджваць іх назад у зямлю.

Пасля эксперыментальнага года выжыла каля 80% елак, якія вярнуліся да гаспадароў ад арандатараў.

Цяпер сям’я запусціла сэрвіс, які дазваляе адсачыць лёс ёлкі, якую раней ужо бралі ў арэнду.

Чытайце таксама: Паглядзіце, які незвычайны ёлачны кірмаш працуе на Савецкай плошчы