Нерухомасць тыдня: у Паўднёвым прадаецца дом з «Раніцай у сасновым лесе» на ўсю сцяну і каралеўскай кухняй

Аднапавярховы дом сонечнага жоўтага колеру сярод соснаў прадаюць у мікрараёне Паўднёвы. Там ёсць лазня, а кухня-гасцёўня — памерам з цэлую кватэру і абстаўлена па-каралеўску.

Дом знаходзіцца ў раёне прыватнай забудовы па адрасе Цішкі Гартнага, 9. Агульная плошча будынка — 214, 6 кв. м, з якіх жылая — 156, 4 кв. м, а плошча кухні-гасцёўні - 42, 9 кв.м. Вышыня столяў - ад 3 метраў.

Дом пабудаваны ў 2013 годзе. Ён складаецца з чатырох пакояў, два з якіх — спальні, а таксама гардэробнай, кухні-гасцёўні з камінам і двух санвузлоў. У доме ўсталяваныя драўляныя міжпакаёвыя дзверы, нацяжныя столі і шклопакеты. Камунікацыі цэнтральныя: ёсць газ, вада, каналізацыя, электрычнасць і інтэрнет. Ацяпляецца дом газавым катлом.

Кухня прыцягвае ўвагу: уся мэбля падабрана ў стылі класіцызму, з дэкаратыўнай разьбой, пазалотай і прэтэнзіяй на раскошу. Адну са сцен у доме амаль цалкам займае рэпрадукцыя карціны «Раніца ў сасновым лесе» Шышкіна і Савіцкага. Астатнія пакоі аформлены больш сціпла і сучасна.

Цокальны паверх можна выкарыстоўваць як майстэрню, спартзалу ці сховішча. Для адпачынку прадугледжаны лазневы комплекс. Мансарднае памяшканне таксама можна пераабсталяваць у дадатковую зону адпачынку, а ў сад выходзіць утульная драўляная тэраса.

Тэрыторыя каля дома займае 12,05 сотак. На ёй дагледжаны газон, расце гартэнзія, хвоі і пладовыя дрэвы. Ёсць гараж з аўтаматычнымі варотамі, паркоўка. Ад цікаўных вачэй участак абгароджаны шчыльным плотам.

Дом размешчаны ў ціхім раёне побач з лесапаркам Альшанка. У крокавай даступнасці знаходзяцца крамы, прыпынкі грамадскага транспарту і рынак «Паўднёвы».

Цана пазначаная як угаворная.