Альтанка «мінтынгавала» у Астравецкім раёне: гаспадар атрымаў штраф

Актывіста антыядзернага руху Мікалая Уласевіча з мястэчка Варняны аштрафавалі на 50 базавых велічыняў (2 тыс. руб.) у Астравецкім раённым судзе. Як мяркуе «Гарадзенская праваабарона», штраф маглі прызначыць з-за альтанкі на прыватным падворку Уласевіча.

Сілавікі расцанілі альтанку як несанкцыяваную акцыю

Сілавікоў непакоіла альтанка Уласевіча — у яе афарбоўцы яны заўважылі «няправільнае» спалучэнне колераў і расцанілі гэта як несанкцыяваную масавую акцыю.

Як паведамляў Telegram-канал «Право имеют», Уласевіча суддзілі па арт. 24.23 часткі 1 КаАП (парушэнне парадку арганізацыі або правядзення масавых мерапрыемстваў). Працэс вяла Святлана Лабор.

На Уласевіча ціснуць ужо шмат гадоў

За крытыку мясцовых уладаў Мікалай Уласевіч і раней падвяргаўся ціску з боку сілавікоў.

У 2011 годзе актывіст выступаў супраць размяшчэння ў Беларусі атамнай станцыі. На яго думку, дакумент парушаў Канстытуцыю, у якой пазначана, што Беларусь з’яўляецца безядзернай зонай. Але тады яго зварот у суд пакінулі без разгляду.

У жніўні 2021 года Уласевіча выклікалі ў Следчы камітэт Астравецкага раёна ў якасці сведкі.

Яго апыталі па двух справах, што тычацца знявагі або знішчэння дзяржаўнага сцяга. У адным выпадку размова ішла аб зрыве, пашкоджанні і выкіданні ў гной банэра з чырвона-зялёным сцягам у вёсцы Трокенікі Астравецкага раёна. Той банэр спачатку размяшчаўся на адміністрацыйным будынку мясцовай сельскай гаспадаркі. Гэты выпадак адбыўся нібыта 10 кастрычніка 2020 года.

У другім выпадку гаворка ішла пра зрыў і абразу сцяга, які быў вывешаны на будынку Упраўлення па працы і сацыяльнай абароне Астравецкага райвыканкама. Гэтае здарэнне адбылося нібыта 11 або 13 чэрвеня 2021 года.

Уласевіч тлумачыў, што як сведка ён не меў ніякага дачынення да гэтых выпадкаў. Такі выклік яго як сведкі Уласевіч разглядаў як форму псіхалагічнага ціску.

Раней у яго праводзілі ператрус, забраўшы бел-чырвона-белы сцяг і герб «Пагоня». Пазней суд Астравецкага раёна аштрафаваў Уласевіча на 40 базавых за БЧБ-сцяг.