У Гродне адбудзецца кававы «гастрафэст» — удзельнічаюць пяць устаноў

Гродзенскія кавярні вырашылі аб’яднацца і дадаць на восень новыя гастранамічныя спалучэнні кававых напояў і дэсертаў. Распачнецца «Кававы марафон» 18 лістапада. Кошт сэтаў фіксаваны — 12 рублёў.

У марафоне ўдзельнічае пяць устаноў:

• Deli (вул. Ажэшкі, 33),
• «Тэмпл» (вул. Маставая, 31),
• «Прахадная» (вул. Маставая, 31),
• «Дзюна» (вул. Маставая, 31),
• «Джэзва» (вул. Савецкая, 35).

У кожнай з кавярняў гасцям прапануюць сэт за 12 рублёў, у які ўваходзіць кававы напой і дэсерт. Першым 50 наведвальнікам, якія зазірнуць ва ўсе ўстановы і замовяць сэты, абяцаюць падарункі.

«Кававы марафон» стартуе 18 лістапада і скончыцца 1 снежня.

Чытайце таксама: Дзе ў Гродне выпіць восеньскую каву

Якія сэты прапануюць у кавярнях

У «Прахадной» для наведвальнікаў падрыхтавалі эклер з фісташкавым крэмам і шакаладна-труфельным капучына.

Паспрабаваць сэт можна кожны дзень з 9:00 да 23:00

У «Джэзве» пададуць арэхавы труфель з фундучнай карамеллю і напой «сметанковы трыа».

Установа адкрыта з 8:00 да 23:00 кожны дзень.

У Deli гасцям прапануюць малінавы сан-себасцьян (чызкейк) і кветкавы латэ.

Кавярня працуе з 7:30 да 22:00 кожны дзень.

У «Тэмпл» можна будзе паспрабаваць какосавую панна-коту з трапічным цэнтрам і латэ з какосам і клубнічнымі джус боламі (ягаднымі шарыкамі).

Установа адкрыта з 9:00 да 23:00 з панядзелка па чацвер і з 9:00 да 24:00 у пятніцу і суботу.

У «Дзюне» пададуць запечаны Бры з цытрусавымі катаіфі і сметанковы раф з белым шакаладам.

Час працы кавярні - з 9:00 да 23:00 кожны дзень.