Затрыманні ў рэгіёнах, 1000 адміністратывак, прысуд за дзяржздраду. Як прайшоў тыдзень у Гродне і вобласці

Затрыманні прайшлі ў Смаргоні, Ваўкавыску і Наваградку. Праваабаронцы паведамілі пра 1000 адміністратывак за распаўсюд экстрэмісцкіх матэрыялаў. Былому дырэктару шклозавода «Нёман» далі 12 гадоў калоніі за дзяржздраду. Рэдакцыя Hrodna.life вывучыла, што адбылося ў вобласці з 28 кастрычніка па 3 лістапада.

304 справы за распаўсюд экстрэмізму разгледзелі за 2024 год толькі ў адным судзе Гродна

З пачатку гэтага года суд Ленінскага раёна Гродна разгледзеў 304 справы па арт. 19.11 КаАП. Пра гэта суддзя распавяла «Вечернему Гродно». Яна ўдакладніла, што цяпер трактуюць як распаўсюд: падпіска на «экстрэмісцкія» рэсурсы, «лайкі», іх капіяванне і перасылка, захоўванне.

Мінчук не ўстаў падчас выканання гімна Беларусі ў Гродне — яго аштрафавалі

Пра выпадак праз год расказала суддзя «Вечернему Гродно»

У 2023 годзе мінчанін, на трыбуне стадыёна, падчас афіцыйнай цырымоніі на спартыўным матчы слухаў гімн Беларусі седзячы. Гэтым ён нібыта здзейсніў «незаконныя дзеянні ў дачыненні да дзяржаўных сімвалаў». Па арт. 24.54 КаАП яму прызначылі штраф — 15 базавых велічынь.

11 жыхароў вобласці судзілі за распаўсюд экстрэмісцкіх матэрыялаў

Па арт 19.11 КаАП «Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць» судзілі жыхароў Гродна, Навагрудка, Ліды, Ваўкавыска, Дзятлава, Воранава, Карэлічаў, Слоніма.

Вярхоўны суд пакінуў без зменаў прысуд праваабаронцу і журналісту Уладзіміру Хільмановічу

Судовая калегія Вярхоўнага суда 25 кастрычніка разгледзела апеляцыйную скаргу Уладзіміра і пакінула прысуд без зменаў, паведамляе «Вясна».

Гродзенскі абласны суд 19 жніўня завочна асудзіў Уладзіміра Хільмановіча за садзейнічанне экстрэмісцкай дзейнасці і ўдзел у экстрэмісцкім фарміраванні на пяць гадоў калоніі ўзмоцненага рэжыму і штраф 1000 базавых велічынь.

У Смаргоні і Ваўкавыску — масавыя ператрусы і затрыманні

Правяраюць інфармацыю на мабільных тэлефонах і геалакацыю тэлефонаў у 2020 годзе. Калі кагосьці не было на працоўным месцы, выклікаюць у аддзяленне, паведамляе Telegram-канал «Суды, задержания. Гродно и область».

Вярхоўны суд разгледзеў апеляцыйную скаргу Вольгі Вялічкі

29 кастрычніка ён пакінуў ранейшы прысуд у сіле, паведамляе «Гарадзенская праваабарона».

Гродзенскі абласны суд 2 жніўня прызнаў Вольгу Вялічку вінаватай па сямі артыкулах КК і прызначыў ёй дзевяць гадоў зняволення і штраф 12 000 рублёў.

Праваабаронцы паведамілі пра масавыя затрыманні 31 кастрычніка ў Навагрудку

Да людзей прыходзілі ў 7 гадзін раніцы, праводзілі ператрусы. Вядома, што некаторых затрымлівалі цэлымі сем’ямі, паведамляе «Вясна».

У Дзятлаўскім раёне за распаўсюд экстрэмісцкіх матэрыялаў прыцягнулі больш за дзесяць чалавек

Пра гэта на прававым прыёме грамадзян у раённай бібліятэцы расказаў пракурор Дзятлаўскага раёна Віталь Юрга. Ён нагадаў пра забарону на падпіску на экстрэмісцкія сайты.

Праваабаронцы апублікавалі дакумент, які сведчыць пра маштаб рэпрэсій у Гродзенскай вобласці

«Гарадзенская праваабарона» заявіла, што атрымала афіцыйны дакумент пад назвай «Материалы для членов информационно-пропагандистских групп (июль 2024 г.). «О мерах противодействия экстремизму и терроризму, реабилитации нацизма. Ответственность за регистрацию на интернет-ресурсах, признанных экстремистскими, распространение экстремистских материалов в глобальной сети Интернет».

Дакумент, падрыхтаваны пракуратурай і Следчым камітэтам Гродзенскай вобласці, уключае дадзеныя аб маштабных рэпрэсіях: за першае паўгоддзе 2024 года АУС прыцягнула да адказнасці па арт.19.11 КаАП 912 чалавек за «распаўсюд экстрэмізму», што амаль у 16 разоў перавышае паказчык 2021 года (57 чалавек).

З 9 жніўня 2020 года па 30 чэрвеня 2024 года ў вобласці зарэгістравана 2448 «злачынстваў» «экстрэмісцкай накіраванасці». У першым паўгоддзі 2024 года налічваецца 242 такія злачынствы, з якіх раскрывальнасць склала 91,3%.

На 1 ліпеня 2024 года ў вытворчасці УСК па вобласці знаходзілася 89 крымінальных спраў гэтай катэгорыі, а ў першым паўгоддзі ў суд накіравана 46 спраў у дачыненні да 67 чалавек.

У першым паўгоддзі 2024 года таксама спынена 1049 выпадкаў распаўсюджвання экстрэмісцкай інфармацыі ў інтэрнэце. Пракуратура са студзеня па чэрвень прад’явіла 49 заяў аб прызнанні матэрыялаў «экстрэмісцкімі», з якіх 46 былі задаволеныя.

З 2021 па чэрвень 2024 года ў суды накіравана 204 такія заявы, 201 з якіх было задаволена.

Былому дырэктару шклозавода «Нёман» далі 12 гадоў калоніі за дзяржздраду

Былога дырэктара шклозавода «Нёман» і дзяржаўнага функцыянера Ігара Бацяна прыгаварылі да 12 гадоў калоніі па артыкуле аб здрадзе дзяржаве. Пакуль інфармацыя афіцыйна не пацверджана.

Канал гродзенскай журналісткі прызналі экстрэмісцкім. Яна пісала пра фемінізм і дранікі

Telegram-канал «Тётя Ира разрешила» прызналі экстрэмісцкім. Так вырашыў суд Астравецкага раёна 21 кастрычніка. Канал на 300 падпісчыкаў вядзе рэдактара з Гродна Ірына Новік. На канале «усяго патроху» — ад рэцэптаў дранікаў да прасоўвання гендарнай роўнасці. Апошні пост — фільм пра жанчын, якія перанеслі рак грудзей.

Стала вядома, якія рэсурсы s13.ru з’явіліся ў спісе экстрэмісцкіх матэрыялаў

Інтэрнэт-сайт «s13.ru» і Telegram-канал «s13.ru — Новости Гродно» з’явіліся ў Рэспубліканскім спісе экстрэмісцкіх матэрыялаў. Гэта значыць, што за падпіску на іх наступіла адказнасць па арт. 19.11 КаАП. Іншыя сацсеткі - напрыклад, Instagram — пакуль бяспечныя.

Звязаны з сілавікамі Telegram-канал «Гродненские сливы» сцвярджае, што яго аўтары пагутарылі з «экспертамі» і даведаліся, чаму партал s13.ru прызналі «экстрэмісцкім».