У ГрДУ ўпершыню раскажуць пра ўніверсітэт бацькам школьнікаў - будзе і YouTube-трансляцыя

У Гродзенскім дзяржаўным універсітэце імя Янкі Купалы правядуць бацькоўскі сход для бацькоў будучых абітурыентаў, вучняў 9−10 класаў. З імі сустрэнуцца рэктарка ўніверсітэта і дэканы факультэтаў, а пытанні можна задаць, нават калі не будзе магчымасці прыйсці асабіста. Такі сход пройдзе ўпершыню ў Беларусі - звычайна мерапрыемствы ладзяць ужо для саміх абітурыентаў і тых, каго залічылі.

Рэктарка ўніверсітэта Ірына Кітурка асабіста раскажа бацькам пра ўступную кампанію і магчымасці універсітэта, піша БелТА са спасылкай на прэс-службу ўстановы. Дэканы факультэтаў таксама паўдзельнічаюць у сходзе і раскажуць пра спецыфіку паступлення і навучання на розных кірунках. Бацькі школьнікаў змогуць асабіста задаць рэктару і дэканам свае пытанні.

Чытайце таксама: Канкурэнцыя ў ГрДУ імя Янкі Купалы: куды паступае больш за 20 чалавек на месца?

Пра тое, якімі шляхамі іх дзеці змогуць паступіць ва ўніверсітэт, бацькам школьнікаў 9−10 класаў раскажа начальніца цэнтра развіцця кар’еры Ірына Карлюкова. Для паступлення на бюджэт ёсць некалькі варыянтаў:

1. Калі дзіця перамагае на ўніверсітэцкай алімпіядзе, яно можа быць залічана без экзаменаў на профільную спецыяльнасць, у рамках вылучанай квоты.
2. Мэтавая падрыхтоўка — падыходзіць тым, хто плануе паступаць па дамове з пэўным прадпрыемствам або арганізацыяй.
3. Паступленне праз агульны конкурс.

Для тых, хто не зможа прысутнічаць асабіста, будзе арганізавана анлайн-трансляцыя на YouTube-канале ўніверсітэта. А калі ёсць пытанні, але няма магчымасці прыйсці, можна задаць іх праз адмысловую Google-форму.

Сход пройдзе 26 кастрычніка, а 10.00. Адрас — вуліца Леніна, 32 (філалагічны факультэт ГрДУ), актавая зала (другі паверх).

Чытайце таксама: Доступ у сталовую ГрДУ абмежавалі ў пэўны час — занадта шмат ахвотных