У гродзенскім гандлёва-забаўляльным комплексе Triniti з’явілася крама іспанскага брэнда Mango. Аўтлет размясціўся на другім паверсе, паведамілі ў Instagram Triniti. Ён пачаў працу 5 кастрычніка.
Ёсць курткі, абутак і джынсы
Пакуль у аўтлеце прадстаўлены жаночыя калекцыі мінулых сезонаў. Згодна з апублікаванымі ў Instagram Triniti сторыс, у асноўным у Mango зараз можна набыць восеньска-зімовае адзенне.
Ёсць пухавікі, бомберы з імітацыяй авечай воўны, скарочаныя курткі, плашчы і паліто. Прапануюць і шырокі выбар джынсаў розных фасонаў і колераў, сярод якіх пастэльныя, цёмна-сінія і чорныя адценні.
Знойдзецца ў аўтлеце і абутак — у асноўным гэта кеды і восеньскія боты з высокай падэшвай. Ёсць і базавае адзенне — кофты, швэдры і блузкі, выкананыя ў светлых колерах.
«Канцэпцыя брэнда — спалучэнне сучаснага погляду на моду і стыль з багатым культурным бэкграўндам і духам Міжземнамор'я», — дадаюць у Instagram.
Што па цэнах у гродзенскім Mango?
Згодна з сайтам Mango, базавая баваўняная кашуля белага колеру абыдзецца ў 140 руб. Куртка са здымнай унутранай часткай каштуе 330 руб., паліто — 500 руб. Жаночыя джынсы розных фасонаў каштуюць ад 140 да 220 руб. Але гэта цэны рэчаў з новай калекцыіі восень-зіма 2024.
Адзенне з мінулых сезонаў у гродзенскім аўтлеце абыдзецца танней. Напрыклад, джэмпер, які каштаваў 179,00 руб., тут каштуе 69,99. Бомбер оверсайз, які каштаваў 329,99 руб., можна купіць за 99,99. Шалік патаннеў з 99,99 да 39,99 рублёў. Джынсы — з 219,99 да 69,99.
Цэны на зніжках атрымліваюцца амаль такія ж, як у анлайн-аўтлеце Mango, калі купляць у Нідэрландах або Польшчы. Праўда, пачатковыя цэны ў беларускі крамах Mango былі на 20−30% вышэй чым у галандскіх або польскіх.
Гродзенскі Mango стаў чацвёртым у краіне
Агулам у Беларусі цяпер чатыры крамы Mango: тры знаходзяцца ў Мінску, а чацвёртая — аўтлет — адкрылася ў гродзенскім Triniti.
