Вакол царквы ў Мураванцы спілавалі ўсе дрэвы

У Мураванцы Шчучынскага раёна вакол царквы Раства Багародзіцы больш няма старых дрэваў. Выпадак — частка агульнай тэндэнцыі.

Фота цяперашняга выгляду царкоўнага падворку апублікаваў у Facebook беларускі фатограф Сяргей Плыткевіч. «Каля Мураванкаўскай царквы-крэпасці больш няма векавых дрэваў», — напісаў ён.

Некалькі чалавек у каментарах да допісу адзначылі, што частку дрэваў пашкодзіў ураган, таму іх спілавалі. Але дрэваў не было ўжо ў студзені 2024 года, адзначыў адзін з каментатараў.

Мураваны плот вакол царквы імкнуцца завершыць да 1 кастрычніка — святкавання 500-годдзя храма. Новыя дрэвы вакол храма саджаць не плануюць.

Працы па аднаўленні царквы Раства Багародзіцы ў Мураванцы пачалі восенню 2022 года. Гэта адзін з нямногіх у Беларусі аб’ектаў, уключаных у папярэдні спіс Сусветнай спадчыны ЮНЕСКА.

Знішчэнне дрэваў - тэндэнцыя часу

Многія каментатары допіса пра Мураванку адзначылі тэндэнцыю да спілоўвання дрэваў на могілках і каля рэлігійных пабудоў у розных частках Беларусі. У прыклад прыводзілі знішчаныя дрэвы каля касцёла Святога Іосіфа ў вёсцы Рубяжэвічы Стаўбцоўскага раёна, касцёл Святога Казіміра ва Уселюбе.

Усе дрэвы, у тым ліку жывую 300-гадовую сасну, якой хацелі надаць статус помніка прыроды, вясной 2024 года спілавалі на могілках вёскі Навасёлкі-2 Лідскага раёна. Шырокі розгалас атрымала знішчэнне здаровых 300-гадовых дубоў у аграгарадку Ахова пад Пінскам. Дырэктара мясцовага Дома культуры, які спрабаваў уступіцца за дрэвы, арыштавалі на 15 сутак.

«Живу в соседней Литве и тут вековые деревья всячески оберегают, подвязывают тросами, чтобы непогода не поломала, защищают ствол рейками и т. д. И только в РБ приходит запросто дядя с пилой и срезает все. В жилых дворах пеньки, вокруг памятников пустота. И такая же пустота внутри людей, кто это делает», — напісаў адзін з каментатараў. У Чэхіі таксама ашчадна ставяцца да дрэваў, адзначыў іншы.

У Гродзенскай вобласці плануюць актыўней выдаляць дрэвы

У Гродзенскай вобласці плануюць «сумесную работу з леснікамі і ЖКГ па своечасовай ацэнцы стану дрэў». «Каб ураган не зламаў іх і не паклаў камусьці на машыну або на дах, іх трэба ўбраць прэвентыўна, — сказаў Уладзімір Каранік у пачатку верасня. — Гэта не значыць, што трэба ўбраць усе дрэвы старэйшыя за пэўны ўзрост, размова ідзе аб іх стане. Відавочна небяспечныя, аварыйныя дрэвы, па-за залежнасцю ад таго, колькі ім гадоў, павінны быць выдаленыя. Гэта датычыцца населеных пунктаў, прасек, па якіх праходзяць лініі электраперадач».

Паведамленні пра планы выдалення дрэваў у апошнія месяцы рэгулярна з’яўляюцца ў раздзеле грамадскіх абмеркаванняў на сайце Гродзенскага гарвыканкама. Фармулёўка ва ўсіх выпадках адна — «замінаюць эксплуатацыі будынка».