Мост пад Гроднам, які змыла летам, аднаўляюць. У канструкцыі ўлічаць змену клімату

Мост праз раку Лашанку пад Гроднам, які змыла моцным ліўнем у жніўні, пачалі будаваць нанова.

Пасля моцнага ліўня, які прайшоў 20 жніўня, у ваколіцах Індуры абрынуліся адразу два масты — каля вёскі Кунцаўшчына і каля Кавалічаў. Адзін з іх у верасні пачалі будаваць нанова. Спачатку прыйшлося прыбраць рэшткі старога маста і падрыхтаваць пляцоўкі для збудавання апор. Да 16 верасня прыехала сваебойная ўстаноўка, прывезлі ўсё патрэбнае абсталяванне і пліты. 18 верасня пачалі ўсталёўваць жалезабетонныя палі. Для апор моста іх спатрэбіцца 32.

Устаноўку плануюць завяршыць на працягу тыдня, расказаў галоўны інжынер філіяла «Аўтамост» КУП «Гроднааблдарбуд» Дзмітрый Карабінскі для БелТА. На наступным тыдні пачнуць майстраваць заборную сценку на першай апоры. Будаўніцтву замінаюць некаторыя дрэвы — іх плануюць спілаваць.

Завяршыць працы плануюць у снежні. Пакуль даводзіцца дабірацца ў аб’езд.

Мост будуюць па-іншаму

Новы мост пабудуюць па новай схеме. Стары быў плітны, двухпралётны, з апорай у рэчышчы. Улічваючы вялікі вадазбор, новы мост запраектавалі без руславай апоры, каб пазбегнуць падмываў. Пралётнае збудаванне зробяць шырэй — 21 м. Заборныя сценкі ўмацуюць бутавым каменем.

Мост каля Кунцаўшчыны будавалі яшчэ ў савецкі час — старыя «тэхналогіі не дазволілі вытрымаць тую нагрузку, якая ўзнікла пры павышэнні ўзроўню вады ў рацэ», расказаў тады намеснік кіраўніка аблвыканкама Андрэй Жук.

Што яшчэ знішчыла вада

Узровень вады ў Лашанцы падняўся на чатыры метры. Рака выйшла з берагоў і падтапіла двары ў вёсцы Лаша, таксама затапіла вёску Баранава. Пацярпелі каля 30 хатніх гаспадарак. Адпампаваць ваду адразу не атрымалася: трэба было дачакацца, пакуль рака вернецца ў рэчышча. Вада знішчыла частку ўраджаю на ўчастках, пашкодзіла платы.

Чытайце таксама:

• У Смаргоні абваліўся мост разам з аўтавышкай на ім: падрабязнасці здарэння
• Яшчэ адзін мост у цэнтры Гродна будуць рамантаваць. Перабудуюць ці ўзмоцняць канструкцыю?