Дрэва знаходзілася на могілках вёскі Навасёлкі-2 Лідскага раёна. Па падліках спецыялістаў, сасне было каля 300 гадоў. Цяпер на яе месцы застаўся толькі пень, паведаміў на сваёй Facebook-старонцы арнітолаг Сяргей Шакала.
«На момант зрэзу дрэва было жывым»
Акружнасць спілаванай сасны складала 412 сантыметраў. «Радня па ўзросце самым старым хвоям Белавежскай пушчы», — адзначыў Шакала. Судзячы па перыметру ствала і смале, якая выступала, «відавочна, што дрэва на момант зрэзу было жывым», напісаў арнітолаг.
Сасне хацелі надаць статус рэспубліканскага помніка прыроды — чыноўнікі пра гэта ведалі
У кнізе 2020 года «Жывыя помнікі», падрыхтаванай спецыялістамі Інстытута эксперыментальнай батанікі НАН Беларусі, сасна апісвалася як дрэва «без прыкмет паслаблення» і была рэкамендавана да аховы ў статусе батанічнага помніка прыроды Беларусі, адзначылі ў Telegram-канале «Спадчына».
Шакала звязаўся з аўтарам кнігі «Жывыя помнікі» Ірынай Вазнячук. Даследчыца паведаміла, што дакументы на наданне сасне статусу помніка прыроды рэспубліканскага значэння былі перададзены да Мінпрыроды яшчэ ў 2021 годзе.
«А мясцовыя ўлады былі апавешчаныя яшчэ раней. Мне нядаўна паведамілі, што яе зрэзалі ў сувязі з тым, што яна засохла. Ужо тры дрэвы сышлі са спісу 10 найстарэйшых у Беларусі, які мы апублікавалі ў кнізе», — напісала Ірына.
У Telegram-канале «Спадчына» адзначаюць, што акрамя 300-гадовай сасны вясной на могілках у Навасёлках-2 спілавалі ўсе дрэвы — «у тым ліку іншыя векавыя сосны».
