Крыміналка на экс-міліцыянта, 250 адміністратывак, затрыманне ў Слоніме. Як прайшоў тыдзень у Гродне і вобласці

У Гродне будуць завочна судзіць былога міліцыянта. 250 адміністратывак за падпіску на Руслана Кулевіча завялі толькі ў адным раёне Гродна. У Слоніме затрымлівалі мясцовага актывіста. Рэдакцыя Hrodna.life вывучыла, што адбылося ў вобласці з 9 па 15 верасня.

Затрыманне ў Гродне

Гродзенца затрымалі за ўдзел у акцыі пратэсту 9 жніўня 2020 года. Сілавікі сцвярджаюць, што затрыманы быў у счэпцы ля фарнага касцёла. Мужчыну змясцілі ў СІЗА.

У Слоніме затрымлівалі мясцовага актывіста

У Слоніме зноў затрымлівалі грамадскага актывіста Алеся Масюка. У пятніцу 6 верасня яго выклікалі ва ўпраўленне КДБ па Слонімскім раёне. Пасля гэтага Масюк праз Слонімскі РАУС бліжэй да вечара апынуўся ў мясцовым ізалятары часовага ўтрымання. На волю ён выйшаў праз трое сутак, у панядзелак 9 верасня, піша «Гарадзенская праваабарона».

З чым звязана гэтае затрыманне — невядома.

Новая «экстрэмісцкая» інфармацыя

Суд Лідскага раёна 9 верасня прызнаў экстрэмісцкім TikTok-акаўнт «news24.tv» і яго лагатып, а 10 верасня — ТікТок-акаўнт «about_belarus» і яго лагатып.

Завочная крыміналка на экс-міліцыянта

У Гродзенскім абласным судзе 23 верасня пройдзе завочны працэс па справе за «здраду дзяржаве» над былым лідскім міліцыянтам Юрыем Махначом, паведамляе «Гарадзенская праваабарона».

Яго абвінавачваюць паводле арт. 356 ч.1 КК. Юрый Махнач — былы падпалкоўнік міліцыі Лідскага РАУС, камандзір роты ППС. У жніўні 2020 года ён публічна распавёў пра падрыхтоўку міліцыі да карных «зачыстак», збіццё затрыманых. Тады ж, 18 жніўня 2020 года, ён падаў у адстаўку са службы ў міліцыі. А пазней праз небяспеку пераследу пакінуў Беларусь і выехаў у Польшчу.

Новыя «экстрэмісты»

Лукашэвіч Павел Юр’евіч з Ліды, Хільмановіч Уладзімір Іванавіч, Занемонскі Сяргей Уладзіміравіч, Сцепаненка Юрый Аляксандравіч, Шумель Галіна Станіславаўна, Тарасевіч Алена Рамуальдаўна, Кебіч Павел Віктаравіч, Чарвякоў Глеб Юр’евіч, Малмыга Эдуард Юзэфовіч, Клунейка Аляксандр Міхайлавіч Чудзілоўскі, Ігар Мікалаевіч, Лях Дзмітрый Сяргеевіч, Грэсь Аляксей Уладзіміравіч з Гродна 13 верасня папоўнілі спіс «экстрэмістаў».

Уладзіміру Гундару адмянілі кароткатэрміновую сустрэчу

Па словах родных Уладзіміра, у верасні з ім павінна была быць кароткатэрміновая сустрэча, але яе зноў адмянілі на год. Па якой прычыне, ён не ведае, паведамляе racyja.com.

Уладзіміру Гундару дазволена перапіска з роднымі, размовы па тэлефоне штомесяц і ўколы па асноўнай хранічнай хваробе, якія не дазвалялі тры папярэднія гады, кажуць блізкія да сям'і людзі.

250 адміністратывак за падпіску на Руслана Кулевіча завялі толькі ў адным раёне Гродна

Гродзенцаў працягваюць судзіць за падпіскі на сацсеткі журналіста Руслана Кулевіча, прызнаныя экстрэмісцкімі. Пра гэта журналіст распавёў у інтэрв'ю Hrodna.life. Толькі ў адным раёне горада ёсць 250 адміністрацыйных спраў.

У Беларусі затрымалі адэптаў руху «Царская імперыя» з Расіі. Але гродзенскі протаіерэй усё роўна абвінаваціў Украіну

Чальцоў рэлігійнага руху «Руская праваслаўная царква — Царская імперыя» затрымалі ў Беларусі ў канцы жніўня. Адэптам прад’явілі абвінавачанні ў стварэнні і кіраўніцтве экстрэмісцкім фарміраваннем. Упершыню на рух звярнулі ўвагу ў Гродзенскай вобласці.