За мінулы тыдзень сярэдняя цана кватэры ў Гродне вырасла на 0,4% і склала $ 827 за «метр». Пры гэтым колькасць кватэр у продажы паменшылася на 2,7%. Сітуацыю на рынку гродзенскай нерухомасці за перыяд 26 жніўня — 2 верасня прааналізаваў Realt.by.
Цэны на нерухомасць у Гродне за год выраслі на 5%
Зараз сярэдні кошт квадратнага метра ў аднапакаёвай кватэры складае $ 827 — гэта на 0,8% вышэй, чым тыдзень таму.
Кошт на «метр» у двухпакаёвай кватэры застаўся без змяненняў — $ 852. Трохпакаёвыя кватэры ў сярэднім падаражэлі на 0,9% — $ 807. Агулам за апошні месяц кватэры ў Гродне дадалі ў цане на 0,5%, за год — на 5,1%.
Статыстыка Realt.by заснаваная на цэнах, пазначаных у актуальных аб’явах па продажы кватэр. Цана квадратнага метра па выніках рэальных дамоваў куплі-продажу на другасным рынку звычайна ніжэйшая.
Напрыклад, у траўні 2024 сярэдняя цана квадратнага метра ў Гродне паводле аналізу аб’яваў склала $ 824, але ў рэальных здзелках была ўсяго $ 746.
Як справы з нерухомасцю ў іншых гарадах вобласці
На 0,5% назіраецца рост цэн у Лідзе — у сярэднім «метр» абыдзецца ў $ 654. У Слоніме і Ваўкавыску кошты засталіся на тым жа ўзроўні, што і тыдзень таму — $ 414 і $ 502 адпаведна.
