Назвалі топ-10 самых бедных раёнаў Беларусі: адзін з іх — у Гродзенскай вобласці

Іўеўскі раён заняў шостае месца ў антырэйтынгу раёнаў Беларусі з самымі нізкімі сярэднімі заробкамі за першае паўгоддзе 2024. Гэта адзіны раён Гродзенскай вобласці ў спісе. З Магілёўскай вобласці ў спіс самых нізкіх зарплат трапілі чатыры раёны, з Гомельскай — тры, а з Віцебскай — два. Дадзеныя пра сацыяльна-эканамічнае развіццё рэгіёнаў Беларусі апублікаваў Белстат.

Дзе ў Гродзенскай вобласці самыя нізкія заробкі?

Самы бедны раён Гродзеншчыны з самымі нізкімі заробкамі — Іўеўскі. Паводле Белстата, сярэдні заробак там складае 1463 руб. На другім і трэцім месцы з нізкімі заробкамі — Свіслацкі (1613 руб.) і Зэльвенскі (1616,7 руб.) раёны.

У Гродзенскай вобласці сярэдні заробак (да выліку падаткаў) склаў 1919 руб. Вышэй толькі ў Гомельскай і Мінскай абласцях — 1945 руб. і 2148 руб. адпаведна.

У параўнанні з леташняй статыстыкай Белстата, заробкі ў самых бедных рэгіёнах Гродзенскай вобласці павялічыліся ў сярэднім на 200 руб. Так у 2023 годзе ў Іўеўскім раёне сярэдні заробак складаў 1279 руб., а ў Свіслацкім — 1290 руб.

Дзе ў Беларусі зарабляюць найменш?

У першым паўгоддзі 2024 года самы нізкі заробак сярод абласцей зафіксаваны ў Магілёўскай вобласці — 1787 руб. Найменш у гэтым рэгіёне зарабляюць у Мсціслаўскім раёне — 1414 руб., Слаўгарадскім — 1434 руб., Хоцімскім — 1435 руб. і Клімавіцкім — 1478 руб.

Партал myfin.by склаў паводле дадзеных Белстата спіс раёнаў Беларусі з найгоршымі заробкамі.

10 рэгіёнаў Беларусі з самымі нізкімі заробкамі

• Шаркаўшчынскі (Віцебская вобл.) — 1387 руб.
• Мсціслаўскі (Магілёўская вобл.) — 1414 руб.
• Слаўгарадскі (Магілёўская вобл.) — 1434 руб.
• Хоцімскі (Магілёўская вобл.) — 1435 руб.
• Кастрычніцкі (Гомельская вобл.) — 1439 руб.
• Іўеўскі (Гродзенская вобл.) — 1463 руб.
• Ушацкі (Віцебская вобл.) — 1472 руб.
• Кармянскі (Гомельская вобл.) — 1473 руб.
• Клімавіцкі (Магілёўская вобл.) — 1478 руб.
• Лельчыцкі (Гомельская вобл.) — 1480 руб.