У знакамітым касцёле ў Астравецкім раёне Гродзенскай вобласці рамантуюць фасады. Telegram-канал «Спадчына» апублікаваў фота і свой крытычны каментар адносна рамонту. Аўтар канала лічыць, што такія працы толькі шкодзяць помніку архітэктуры.
«Па-першае, цэмент наносіць шкоду муроўцы на вапне, — піша аўтар паста. — Па-другое, спачатку трэба счысціць ружовую фарбу, якой у нас чамусьці любяць наводзяць парадачак на фасадах з чырвонай цэглы, а пасля ўжо перакладаць асобныя цагліны, калі яны разбурыліся (чаго не бачна), або наноў рабіць швы. А не тупа мазаць усё разам!»
![касцёл у Гервятах - ідзе рамонт фасадаў з парушэннямі](https://hrodna.life/wp-content/uploads/2024/07/gervjaty-01-599x800.webp)
![касцёл у Гервятах - ідзе рамонт фасадаў з парушэннямі](https://hrodna.life/wp-content/uploads/2024/07/gervjaty-02-599x800.webp)
![касцёл у Гервятах - ідзе рамонт фасадаў з парушэннямі](https://hrodna.life/wp-content/uploads/2024/07/gervjaty-03-599x800.webp)
![У касцёле ў Гервятах цагляныя фасады рамантуюць цэментам. Гэта шкодзіць помніку](https://hrodna.life/wp-content/uploads/2024/07/gervjaty-04-599x800.webp)
![У касцёле ў Гервятах цагляныя фасады рамантуюць цэментам. Гэта шкодзіць помніку](https://hrodna.life/wp-content/uploads/2024/07/gervjaty-05-599x800.webp)
Сапраўды, касцёл пабудаваны з чырвонай цэглы, але яе дадаткова зверху пафарбавалі ў іншае адценне. Пабачыць арыгінальны колер цаглін можна ў невялікім зандажы на адным з фота або на здымку ўваходнай брамы, якую яшчэ не фарбавалі.
Будаўнічыя рыштаванні на вежы і ля ўваходу ў касцёл стаяць ужо як мінімум два гады. Верхнюю частку вежы ўжо адрамантавалі і пафарбавалі, таму частку рыштаванняў разабралі. Зараз яны даходзяць да прыкладна паловы вышыні вежы.
У каментарыях адзін з карыстальнікаў Telegram выказвае здагадку, што працы робяць без адпаведнага дазволу і заклікае пісаць пра магчымае парушэнне ў Міністэрства культуры.
Чым адметны касцёл у Гервятах
Неагатычны касцёл Святой Тройцы ў Гервятах — помнік архітэктуры мяжы XIX і XX стагоддзяў. Гэта адзін з самых высокіх касцёлаў Беларусі. Многія турыстычныя сайты называюць яго таксама самым прыгожым у краіне. Дзякуючы яму Гервяты — папулярны напрамак сярод турыстаў у Беларусі.