У Гродне пачалі ўсталёўваць ліфты з шрыфтам Брайля і музычным суправаджэннем. Першы падобныя пад’ёмнікі размясцілі ў шматпавярховіках на праспекце Кляцкова, паведаміў тэлеканал «Гродна Плюс».
У чым асаблівасць новых ліфтаў
У новых ліфтах ёсць дадатковыя опцыі. Там ёсць сэнсарныя датчыкі, якія не дазваляюць закрыць дзверы раней, чым пасажыры зойдуць у ліфт. Спецыяльна для людзей з інваліднасцю павялічылі шырыню праёмаў. На ўсіх кнопках прадублявалі інфармацыю мовай Брайля для людзей са слабым зрокам. У кожнай кабіне ёсць камера відэаназірання. Таксама ў новых ліфтах будзе граць расслабляючая музыка.
Сам пад’ёмнік будзе падымацца з хуткасцю 1 метр у секунду. Звычайныя ліфты павольнейшыя — 0,71 метр у секунду. Тэрмін эксплуатацыі новых ліфтаў павялічылі на пяць гадоў - з 25 да 30.
У якіх дамах з’явяцца новыя ліфты
Агулам у горадзе плануюць усталяваць 31 такі ліфт. З іх 19 размесцяць у дамах Кастрычніцкага раёна і 12 у дамах Ленінскага раёна Гродна. Зараз мантаж васьмі кабінаў адбываецца ў шматпавярховых дамах на праспекце Кляцкова № 23/2, 17, 19 і 35. Акрамя гэтага, ліфты з’явяцца ў дамах па адрасе:
- вуліца Фолюш 15/212а і 15/213;
- вуліца Паўднёвая, 13;
- Індурская шаша, 2;
- другі завулак Дзяржынскага, 3 і 2;
- завулак Дзяржынскага, 7;
- вуліца Брыкеля, 23/2;
- вуліца Ліможа, 28;
- вуліца Курчатава, 28;
- вуліца Малышчынская, 13.
Прыярытэт ва ўстаноўцы ліфтаў залежыць ад узросту і зносу наяўных ліфтаў. Яшчэ 30 новых ліфтаў хочуць усталяваць у 2025 годзе.
Чытайце таксама: «Cэрца калоціцца». Жыхары Фолюша штотыдзень захрасаюць у новых ліфтах і прапануюць замяніць іх
