Доля выдаткаў на харчаванне ў Гродзенскай вобласці склала 38,6% – больш за ўсё. Белстат апублікаваў дадзеныя аб узроўні жыцця хатніх гаспадарак Гродзенскай вобласці ў IV квартале 2023 года – параўналі іх з агульнабеларускай статыстыкай.
Па выбарачным абследаванні хатніх гаспадарак (людзей, якія жывуць разам, і з агульным бюджэтам), наяўныя рэсурсы [грашовыя сродкі і кошт прадуктаў, вырашчаных на сваім участку за мінусам затрат на іх вытворчасць, ільготы і выплаты – Hrodna.life] у Гродзенскай вобласці для кожнага хатняй гаспадаркі склалі 2069,3 рубля на месяц.
Агулам у Беларусі ў IV квартале 2023 годзе наяўныя рэсурсы ў разліку на хатнюю гаспадарку склалі 2184,3 рубля на месяц, у тым ліку ў гарадах і пасёлках гарадскога тыпу – 2304,6 рубля на месяц, у вёсках – 1795 рублёў на месяц.
Грашовыя выдаткі жыхароў Гродзенскай вобласці ў апошні квартал года склалі 1962,4 рубля на хатнюю гаспадарку за месяц, з якіх 1467,8 рубля (74,8%) прыпадае на спажывецкія расходы. У іх уваходзяць харчаванне (38,6%), купля нехарчовых тавараў – 36,8% і аплата паслуг – 22,2%.
Па Беларусі ж грашовыя выдаткі ў разліку на хатнюю гаспадарку склалі больш – 2087,8 рубля на месяц, з якіх 1518,7 рубля (72,7%) ідзе на спажывецкія выдаткі. Выдаткі на харчаванне склалі 37,3%, на куплю нехарчовых тавараў – 36,8%, на аплату паслуг – 23,3%. Выходзіць, што ў Гродзенскай вобласці доля выдаткаў на ежу крыху большая, чым у сярэднім па Беларусі, а на аплату паслуг – меншая.
Чытайце таксама:
- Больш за 3000 заплацяць толькі намесніку галоўнага ўрача. Якія заробкі прапануюць медыкам у Гродна і вобласці
- За чатыры паездкі ў Польшчу — нармальны беларускі заробак. Колькі зарабляюць беларускія чаўнакі?
- У Гродне і вобласці шукаюць выкладчыкаў і настаўнікаў. Вось якія заробкі прапануюць у сферы адукацыі ў 2024-м
