Ля сажалкі на Рэпіна хочуць стварыць інклюзіўную дзіцячую пляцоўку: дапамагчы можа кожны гродзенец

На вуліцы Рэпіна можа з’явіцца новая спартова-гульнявая пляцоўка пад адкрытым небам. Цэнтр дапамогі «Вера», які знаходзіцца побач, плануе арганізаваць яе як месца, якім змогуць карыстацца дзяці з інваліднасцю і без.

Як будзе выглядаць пляцоўка

Спартовая пляцоўка будзе часткай гарадскога парка і зоны адпачынку. Пляцоўка будзе адкрытай і гуляць там змогуць усе жадаючыя.

Пляцоўка будзе складацца з некалькіх гульнявых і спартовых комплексаў. Там плануюць размясціць стол-пясочніцу са спецыяльным месцам для пад’езду вазка і спецыялізаваную горку. Для развіцця дробнай маторыкі і развіваючых гульняў арганізуюць спецыяльныя панэлі, лабірынты і лічыльнікі.

Для гульняў арганізуюць домікі, арэлі, кухню-майстэрню, мішэнь з лічыльнікамі, разнастайныя гойдалкі на спружынах, а таксама арэлі-балансір. На думку супрацоўнікаў Цэнтра дапамогі «Вера», абсталяванне дазволіць дзецям у гульнявой форме развівацца і ўзмацняць фізічнае здароўе. А сама пляцоўка стане ўніверсальным месцам для стасавання дзяцей з асаблівасцямі і без.

Колькі грошай трэба для такога праекта

Усё абсталяванне плануюць вырабляць з экалагічных матэрыялаў. Афармленне мусіць быць яскравым і прыемным на дотык. Частку абсталявання хочуць вырабіць па індывідуальнай замове Цэнтра дапамогі «Вера», а частку набыць у Расіі.

Цану гэтага праекта ацэньваюць ў 300 тыс. рублёў ($ 93 тыс.). Збіраць такую суму ў цэнтры плануюць праз дабрачынны збор. Таму гульнявыя комплексы і трэнажоры плануюць закупаць і ўсталёўваць па меры паступлення сродкаў, а ў праекта няма дакладных часовых межаў.

Як можна дапамагчы

• Вы можаце стаць партнёрам праекта, а ваш удзел абазначаць на інфармацыйным стэндзе, які размесцяць побач з пляцоўкай.
• Можна дапамагчы інфармацыйнай падтрымкай і распавядаць пра праект у сацыяльных сетках і на іншых інфармацыйных рэсурсах.
• Можна зрабіць ахвяраванне на дабрачынныя рэквізіты Цэнтра з накіраваннем плацяжа «пляцоўка». Сродзі накіруюць на набыццё гульнявога і спартовага абсталявання. Для дапамогі ад юрыдычных асоб варта звязацца з прадстаўнікамі Цэнтра па тэлефоне +375 33 646−15−49.

Ідэю прыдумалі восем гадоў таму, але пакуль не змаглі рэалізаваць

На паперы гэты праект існуе восем гадоў. Першапачаткова ідэю агучвалі ў Гродзенскім гарадскім выканаўчым камітэце і сумесна з гарадской адміністрацыяй спрабавалі рэлізаваць яе. На арганізацыю пляцоўкі спрабавалі атрымаць грантавае фінансаванне, а таксама знайсці інвестараў і партнёраў. Але праект так і не рэалізавалі.

Чытайце таксама: Улада ліквідавала арганізацыі, якія дапамагалі уязвімым. Іх месца не зойме дзяржава і бізнес