Дзіцячыя крамы «Буслік» захаваюць — каб напоўніць беларускімі таварамі

"Буслік" у Triniti - апошняя ў Гродне крама сеткі. Фота: Triniti

Сетку супермаркетаў дзіцячых тавараў «Буслік» вырашылі трансфармаваць і напоўніць беларускім дзіцячым адзеннем, распавялі ў Міністэрстве антыманапольнага рэгулявання і гандлю. Да гэтага «Буслік» папярэдзіў улады аб банкруцтве.

Кіраўніцтва «Бусліка» з заявай аб папярэджанні банкруцтва звярталася ў Мінгарвыканкам, піша ilex.by. Кампанія прапанавала шляхі паляпшэння сітуацыі: арэндныя вакацыі, перагляд умоў крэдытнай лініі, павелічэнне гандлёвай нацэнкі.

Праблемы ў «Бусліка» пачаліся ў 2023 годзе. Выручка падала на працягу ўсяго года. У кастрычніку польская кампанія CDRL, якая валодала 90% беларускай сеткі з 2018 года, паведаміла пра «страту кантролю» над «дачкой» і пагрозу яе банкруцтва на фоне палітыка-эканамічнай сітуацыі ў Беларусі.
У CDRL таксама заявілі аб спісанні пратэрмінаванай дэбіторскай запазычанасці сеткі ў 1,7 млн злотых (больш за $ 400 тыс.) і прыпыненні далейшых паставак тавараў у Беларусь.

Да таго моманту сетка «Буслік» скарацілася да 28 гандлёвых аб’ектаў. Зараз іх засталося яшчэ ўдвая менш. У Гродне з дзейных раней пяці аб’ектаў крама «Буслік» засталася толькі ў Triniti.

У краме прадаюцца адзенне для малых і старэйшых дзетак, тавары для догляду, дзіцячае харчаванне, тавары для школы і творчасці і цацкі. Асартымент перавысіў 25 тысяч найменняў, паведамляе сайт сеткі.

Цяжкасці ў гэтага і іншых рытэйлераў не звязаныя з дзеяннем пастановы № 713 (аб дзяржаўным рэгуляванні цэн), запэўнівае міністр антыманапольнага рэгулявання і гандлю Аляксей Багданаў. І адмяняць гэтую пастанову ў 2024 годзе не плануюць.