У Гродне праз конкурс шукаюць праект для набярэжнай. Падавацца могуць усе

Аблвыканкам Гродна аб’явіў конкурс праектаў па добраўпарадкаванні набярэжнай Нёмана. Прапаноў чакаюць не толькі ад прафесійных архітэктараў, але і ад звычайных жыхароў горада.

Удзельнікі павінны паказаць свае варыянты архітэктурнай канцэпцыі таго, як павінна выглядаць набярэжная Нёмана. Конкурс назвалі «Злучаючы мосты і берагі». Яго правядуць па трох намінацыях:

• прафесіяналы;
• навучэнцы;
• грамадзяне.

Ацэньваць працы будуць паводле некалькіх крытэрыяў. Сярод іх арыгінальнасць ідэі, выкарыстанне сучасных тэхналогій, асартымент раслін, тое, як праект будзе спалучацца з суседнімі тэрыторыямі і магчымасць усесезоннага выкарыстання набярэжнай.

Заяўкі і конкурсныя матэрыялы можна падаць у камітэт па архітэктуры і будаўніцтве аблвыканкама да 1 лістапада на e-mail: naberezhnaya.grodno23@gmail.com. Найлепшым працам у кожнай з намінацый абяцаюць «самавітыя грашовыя прызы».

Аб тым, што плануецца шукаць праекціроўшчыка для адрэзка набярэжнай ад Старога да Новага моста праз конкурс, паведамлялі яшчэ ў лютым 2023 года. Гарадскія ўлады разлічваюць, што прыгожая добраўпарадкаваная набярэжная з’явіцца ў Гродне праз пяць гадоў, да 900-годдзя Гродна.

Што з набярэжнай зараз?

Telegram-канал Urban Hrodna вылучыў найбольш актуальныя праблемы:

• практычна няма лавачак, каб адпачыць;
• няма зручных спускаў да вады;
• тусавацца на набярэжную прыязджаюць (гараджанам гэта важна!), але на машынах, гэта робіць прастору небяспечнай;
• летам няма ценю;
• нявыкарыстаныя схілы. Там можна было б зрабіць тэрасныя спускі з лавачкамі, ландшафтныя кампазіцыі з раслін, летнія сцэны і шмат чаго яшчэ;
• няма грамадскіх прыбіральняў;
• не вылучаны веладарожкі;
• мог бы быць фудкорт, але яго няма;
• частка набярэжнай на вул. Рыбацкай наогул ніяк не ўладкована нават для людзей, што там жывуць — пабіты асфальт, ямы, пыл.

Частку набярэжнай у рамках свайго праекта плануюць уладкаваць новыя ўладальнікі піўзавода. Тэрыторыя не будзе агароджана, як зараз, будзе спуск да ракі.

Праект быў - грошай не было

Праект добраўпарадкавання набярэжнай ад вусця Гараднічанкі да Новага моста даўно распрацаваны ў інстытуце «Гроднаграмадзянпраект», пісаў у лісце да Hrodna.life архітэктар Аляксандр Штэн у 2019 годзе. Адна з прычын, чаму ён не рэалізаваны — у бюджэте няма для гэтага грошай.

Чытайце таксама: Грамадскія грылі, выхад да ракі, няма машын: гродзенец прыдумаў, як ажывіць набярэжную Нёмана