Штраф для «Лідскага піва» мог быць сігналам бізнесу ад дзяржавы. У чым незвычайнасць сітуацыі

Штраф у € 12 млн, атрыманы «Лідскім півам» ад Камітэта дзяржкантролю, мог быць папярэджаннем аб неабходнасці спыніць спробы продажу кампаніі. Пры інфармацыі аб такім сур’ёзным спагнанні ўсе менеджары кампаніі знаходзяцца на свабодзе.

Апошняе — вельмі незвычайная сітуацыя для Беларусі, піша «Наша Ніва» са спасылкай на меркаванне прадстаўніка буйнога замежнага бізнесу з офісам у Мінску. Ён мяркуе, што гэта мог быць сігнал для Olvi, замежнага канцэрна-уласніка «Лідскага піва», «не рыпацца» і спыніць спробы продажу прадпрыемства: маўляў, і прадаць не атрымаецца, і штраф будзе.

Пра штраф у 35,8 млн рублёў па выніках праверкі ад КДК стала вядома 20 лютага. «Лідскае піва» звярнулася ў раённы суд са спробай аспрэчыць яго. Сума штрафа прыблізна роўная чыстаму прыбытку «Лідскага піва» за 2021 год.

«Гэта не задача знішчыць бізнэс — хай працуюць, задача паказаць астатнім кампаніям з замежным капіталам, што бегчы не дадуць, — кажа крыніца ў бізнесе. — У гэтым, дарэчы, адрозненне стаўлення Лукашэнкі ад стаўлення Пуціна, які гоніць з Расіі заходнія кампаніі. А тут, наадварот, спрабуюць утрымаць іх. Як умеюць — сілай».

Пэўныя намаганні для продажу кампаніі былі, нягледзячы на забарону ад дзяржавы, кажуць крыніцы. Зрэшты, пра іх паведамляла і сама кампанія ў за трэці квартал 2022 года. Тады яна спрадзявалася на продаж завода «цягам наступных 12 месяцаў», і адзначала, што перамовы «ідуць па планах», і ёсць «новыя запыты». Прадаваць завод фінская кампанія вырашыла пасля нападу Расіі на Украіну і падтрымкі гэтай агрэсіі з боку афійных беларускіх уладаў.

Пазней Аляксандр Лукашэнка папярэдзіў замежны бізнэс: «Ніхто нічога не прадасць з замежным капіталам — гэта будзе нацыяналізавана». Спецыяльным указам ён забараніў рэарганізацыю юрыдычных асоб з капіталам з «несяброўскіх» краін. У спіс забароны на продаж трапілі 1849 юрыдычных асоб, зарэгістраваных у Беларусі. У тым ліку там знаходзіцца і «Лідскае піва».