Супрацоўнік службы адлову ў Гродне скраў мяса, якое прынеслі для бяздомных сабак. Што яго чакае

Супрацоўнік Гродзенскай службы адлову безнаглядных жывёл забраў некалькі кілаграм ялавічнага абрэза, прызначанага для падапечных доміка для бяздомных сабак грамадскай арганізацыі «адданае сэрца». Справа дайшла да суда, піша NewGrodno.

Крадзеж адбыўся 19 студзеня. У той дзень у пункт часовага ўтрымання жывёл патэлефанаваў мужчына і паабяцаў прынесці для сабак ялавічныя абрэзкі, распавёў на судзе гарадзенскі валанцёр. У доміку для сабак у Лапенках тады нікога не было, і мужчына павесіў пакет з мясам на плот, сфатаграфаваў яго і даслаў фота валанцёрам.

Гродзенскае грамадскае аб’яднанне абароны жывёл «Адданае сэрца» існуе з 2011 года. Гэта некамерцыйная, недзяржаўная арганізацыя. Асноўная мэта — дапамога бадзяжных жывёлам, скарачэнне іх колькасці шляхам стэрылізацыі, пошук новых гаспадароў для безнаглядных жывёл, прыцягненне ўвагі грамадства да іх праблем і жорсткага стаўлення да іх. Частка выратаваных сабак чакаюць новых гаспадароў у часовым доме ў Лапенках. Гродзенцы дапамагаюць валанцёрам ахвяраваннямі і ежай для жывёлаў, выгульваюць сабак і адкапываюць участак пасля моцных снегападаў, ладзяць фотасесіі і дапамагаюць знайсці новых гаспадароў.

Пазней да дома пад’ехала «ГАЗель» з трыма мужчынамі. Праехаўшы далей, машына развярнулася і спынілася ля плота. Адтуль выйшаў мужчына, забраў пакет з мясам, і машына з’ехала. Гэты момант трапіў на камеры назірання. На запісе відаць, што мужчына быў у форме, і бачныя нумары машыны. Валанцёры звярнуліся ў міліцыю.

Справу па артыкуле 11.1 КаАП (Дробны крадзёж) разглядаў суд Ленінскага раёна Гродна. Растлумачыць свой учынак у судзе мужчына не змог. Распавёў, што, выйшаўшы з машыны, «убачыў пакет з мясам, якое смярдзела, і вырашыў забраць». Пасля казаў, што хацеў аддаць мяса іншым сабакам, і што хацеў «адразу кампенсаваць шкоду», купіўшы «гэтым сабакам нармальнага „Бобіка“ ў краме», нібыта прасіў тэлефоны валанцёраў, але іх яму не далі.

Мужчына прызнаў віну часткова. Суму шкоды ў 30 рублёў ён абавязаўся перавесці на дабрачынны рахунак арганізацыі. Мужчыну чакае адміністрацыйная адказнасць. Канчатковую пастанову суд вынесе на наступным тыдні.